ഗർഭിണി വൈദ്യുതാഘാതമേറ്റ് മരിച്ചു

ഹരിപ്പാട്: വൈദ്യുതാഘാതമേറ്റ് ഗർഭിണിയായ യുവതി മരിച്ചു. പള്ളിപ്പാട് വെട്ടുവേനി രാഹുൽ ഭവനിൽ ഹരികുമാർ-മിനി ദമ്പ തികളുടെ മകൾ ഹരിത(23) ആണ്​ മരിച്ചത്​. അപകടം നടന്ന ഉടൻ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ശനിയാഴ്ച വൈകുന്നേരം 4.30 ഓടെയായിരുന്നു സംഭവം. വീട്ടിലെ ഇരുമ്പ് അലമാര തുറക്കുന്നതിനിടയിൽ വൈദ്യുതാഘാതമേൽക്കുകയായിരുന്നു.

വീട്ടിൽ പട്ടിക്കൂട് നിർമ്മിക്കുന്ന ജോലിയിലായിരുന്നു ഭർത്താവ് വിഷ്ണു. ഈ ആവശ്യവുമായി ബന്ധപ്പെട്ട് വെൽഡിംങ് ജോലിക്ക് വീട്ടിൽ നിന്നും വൈദ്യുതി എടുത്തിരുന്ന വയർ ഇരുമ്പലമാരയിൽ തട്ടിയിരുന്നു. ഇതിൽ നിന്ന് വൈദ്യുതി ആഘാതമുണ്ടായതാണ് അപകടകാരണമെന്ന് പൊലീസ് പറഞ്ഞു. ഹരിതയും വിഷ്ണുവും വിവാഹിതരായിട്ട് ഒന്നര വർഷം കഴിഞ്ഞു. ​ഒൻപത് മാസം ഗർഭിണിയായിരുന്നു ഹരിത. ആശുപത്രിയിലേക്ക്​ കൊണ്ടുപോവുന്നതിനായി ഫയൽ എടുക്കാൻ അലമാര തുറന്നപ്പോഴാണ് വൈദ്യുതാഘാതമേറ്റത്​. രാഹുൽ സഹോദരനാണ്.

മൃതദേഹം ഹരിപ്പാട് താലൂക്ക് ആശുപത്രിയിൽ. ഞായറാഴ്ച വണ്ടാനം മെഡിക്കൽ കോളേജ് ആശുപത്രിയിൽ പോസ്റ്റ്​മോർട്ടം നടക്കും.