'പ്രസീത: ഹലോ.. സുരേന്ദ്രന്‍ പറഞ്ഞിട്ടാണ് വിളിക്കുന്നത്. ഗണേഷ്: വേണ്ടവിധത്തില്‍ അക്കാര്യങ്ങള്‍ സംസാരിച്ചിട്ടുണ്ട്'; ബി.ജെ.പിയെ വീണ്ടും വെട്ടിലാക്കി ഫോൺ ശബ്​ദരേഖയുമായി​ പ്രസീത

കണ്ണൂർ: എൻ.ഡി.എയുമായി സഹകരിക്കാൻ സി.കെ. ജാനുവിന്​ 25 ലക്ഷം കോഴ നൽകിയെന്ന ആരോപണത്തിൽ കൂടുതൽ തെളിവുകൾ പുറത്തുവിട്ട്​ ​ബി.ജെ.പിയെ വീണ്ടും വെട്ടിലാക്കി പ്രസീത അഴീക്കോട്. പണമിടപാടുമായി ബന്ധപ്പെട്ട്​ ആർ.എസ്.എസ് ഒാർഗനൈസിങ് സെക്രട്ടറി എം. ഗണേഷുമായി സംസാരിച്ചതി​െൻറ ഫോണ്‍ റെക്കോര്‍ഡാണ് ജെ.ആർ.പി ട്രഷററായ പ്രസീത ഇപ്പോൾ പുറത്തുവിട്ടിരിക്കുന്നത്​.

സുരേന്ദ്രന്‍ പറഞ്ഞിട്ടാണ് വിളിക്കുന്നതെന്നും ജാനുവി​െൻറ കാര്യത്തിന് വേണ്ടിയാണെന്നും പ്രസീത പറയുന്നുണ്ട്. വേണ്ട വിധത്തില്‍ അക്കാര്യങ്ങള്‍ സംസാരിച്ചിട്ടുണ്ടെന്നും സുരേഷ് എന്നയാളെ ചുമതലപ്പെടുത്തിയിട്ടുണ്ടെന്നും ഗണേഷ് ഫോണ്‍ സംഭാഷണത്തില്‍ മറുപടിയായി പറയുന്നുമുണ്ട്​.

''ജാനു തന്നെ വിളിച്ചിരുന്നു. സുരേഷുമായി അവര്‍ സംസാരിച്ച് പരസ്​പരം ധാരണയിലെത്തിയിട്ടുണ്ട്​'' എന്നടക്കം ഗണേഷ് സംഭാഷണത്തില്‍ പറയുന്നതായി കേള്‍ക്കാം.

നേരത്തെ ജാനുവിന് കോഴ നല്‍കിയതുമായി ബന്ധപ്പെട്ട് പ്രസീത ബി.ജെ.പി സംസ്ഥാന അധ്യക്ഷന്‍ കെ. സുരേന്ദ്രനുമായുള്ള ഫോണ്‍ സംഭാഷണവും പുറത്തുവിട്ടിരുന്നു. ജാനുവിന് 25 ലക്ഷം രൂപ നല്‍കാന്‍ ഗണേഷിനെ ചുമതലപ്പെടുത്തിയിട്ടുണ്ടെന്നായിരുന്നു ഈ സംഭാഷണത്തില്‍ സുരേന്ദ്രന്‍ പറഞ്ഞത്. ഇതിനെ സാധൂകരിക്കുന്നതാണ് ഇപ്പോൾ പ്രസീത പുറത്തുവിട്ട ഗണേഷുമായുള്ള ഫോണ്‍ സംഭാഷണം.

കോഴ നൽകിയെന്ന ആരോപണത്തിൽ ക്രൈം ബ്രാഞ്ച്​ വയനാട്​ യൂനിറ്റ്​ കേസെടുത്തിട്ടുണ്ട്​​. അന്വേഷണവുമായി ബന്ധപ്പെട്ട്​ കഴിഞ്ഞ ദിവസം പ്രസീതയടക്കം മൂന്ന്​ ജെ.ആർ.പി നേതാക്കളുടെ മൊഴി ക്രൈംബ്രാഞ്ച്​ സംഘം രേഖപ്പെടുത്തിയിരുന്നു.