പ്രഫുൽ ഖോഡ പ​ട്ടേൽ; ഏകാധിപത്യത്തി​െൻറ ആൾരൂപം

കോഴിക്കോട്​: വിദ്യാലയങ്ങൾ തടവറയാക്കാൻ ഉത്തരവിട്ട ഒരുപക്ഷേ ഇന്ത്യയിലെ ഏക ഭരണാധികാരി ലക്ഷദ്വീപി​ന്‍റെ അഡ്​മിനിസ്​ട്രേറ്റർ പ്രഫുൽ ഖോഡ പ​ട്ടേൽ ആയിരിക്കും. അധികാര ദുർവിനിയോഗവും ഏകാധിപത്യ പ്രവണതകളും ആവശ്യത്തിലധികം കാണാനാകും അദ്ദേഹത്തി​ന്‍റെ അധികാരവഴികളിൽ. പ്രഫുൽ പ​ട്ടേലി​ന്‍റെ പിതാവ്​ ഖോഡാഭായ്​ രൻജോദ്​ഭായ്​ പ​ട്ടേൽ ഗുജറാത്തിലെ ആർ.എസ്​.എസ്​ നേതാവും മോദിയുടെ വളരെ അടുത്ത സുഹൃത്തും ആയിരുന്നു.

അധികാരത്തിലേക്കുള്ള വഴികൾ തെളിയുന്നത്​ അ​ങ്ങനെയാണ്​. മോദി ഗുജ്​റാത്ത്​ മുഖ്യമന്ത്രിയായിരിക്കെ മന്ത്രിസഭയിൽ അംഗമായിട്ടുണ്ട്​. സംസ്​ഥാന ആഭ്യന്തര മന്ത്രിയായിരുന്ന അമിത് ഷാ ജയിലിലായിരുന്നപ്പോൾ ആ വകുപ്പുകൾ കൈകാര്യം ചെയ്ത മന്ത്രിയായിരുന്നു പ്രഫുൽ ഖോഡ. സൊഹ്​റാബുദീൻ ശൈഖ്​ വ്യാജ ഏറ്റുമുട്ടൽ കൊലയടക്കം സംഘ്​ പരിവാർ ഭരണകൂടത്തി​ന്‍റെ പല വിവാദ സംഭവങ്ങളിലും നേരിട്ട്​ ബന്ധമുള്ള നേതാവ്​.

പിന്നീട് തെരഞ്ഞടുപ്പിൽ തോറ്റു. മോദി പ്രധാനമന്ത്രിയായപ്പോൾ മറന്നില്ല. കേന്ദ്ര ഭരണ പ്രദേശമായ ദമൻ-ദിയു അഡ്​മിനിസ്​ട്രേറ്ററാക്കി. മുൻപ് ഗോവയുടെ ഭാഗമായിരുന്ന ദമൻ-ദിയുവും ദാദ്ര-നഗർ ഹവേലിയും യോജിപ്പിച്ച് ഒറ്റ കേന്ദ്ര ഭരണ പ്രദേശമാക്കിയത്​ 2019ലാണ്. ആദ്യ അഡ്മിനിസ്ട്രേറ്ററായി പ്രഫുൽ പട്ടേൽ എന്ന ബി.ജെ.പി നേതാവിനെ നിയമിക്കുകയും ചെയ്​തു. ഐ.എ.എസ്​ ഒഫിസറല്ലാത്ത ആദ്യത്തെ അഡ്​മിനിസ്​ട്രേറ്ററാണ്​ പ്രഫുൽ ഖോഡ പ​ട്ടേൽ.

ലക്ഷദ്വീപ് അഡ്മിനിസ്റ്റേറ്ററായിരുന്ന ദിനേശ്വർ ശർമ മരിച്ചതിനെ തുടർന്ന്​ കഴിഞ്ഞ ഡിസംബർ മുതൽ ദ്വീപി​ന്‍റെ അധിക ചുമതലയും ശർമയെ ഏൽപിച്ചിരിക്കുകയാണ്​ കേന്ദ്ര സർക്കാർ. ലക്ഷദ്വീപിൽ നടപ്പിലാക്കിയതിനെക്കോൾ മോശം പരിഷ്​കാരങ്ങളാണ്​ പ്രഫുൽ ഖോഡ പ​ട്ടേൽ ദമൻ-ദിയുവിൽ നടപ്പിലാക്കിയത്​. ബുൾഡോസർ ഉപയോഗിച്ച്​ തീരദേശവാസികളുടെ കുടിലുകൾ മുഴുവൻ ഇടിച്ചുനിരത്തി. വ്യവസായികൾക്ക് വേണ്ടി ആദിവാസികളായ മൽസ്യ തൊഴിലാളികളുടെ ഭൂമി പിടിച്ചെടുത്തു.

സമരത്തെ കിരാതമായി അടിച്ചമർത്തി. ആളുകൾ പ്രതിഷേധിച്ച്​ തുടങ്ങിയ​േപ്പാൾ മുദ്രാവാക്യം വിളിയും ഉച്ചഭാഷിണി ഉപയോഗവും വിലക്കി. പ്രതിഷേധിച്ചവരെ അറസ്​റ്റ്​ ചെയ്​ത്​ തടവിൽ പാർപ്പിക്കുന്നതിനായി രണ്ട്​ സ്​കൂളുകൾ ജയിലുകളാക്കി മാറ്റാനും ഇദ്ദേഹം ഉത്തരവിട്ടു. ദാദ്ര നാഗർ ഹവേലിയിൽനിന്നുള്ള പാർലമെൻറംഗമായ​ മോഹൻഭായ്​ സൻജിഭായ്​ ദേൽഖറിനെ 2021 ഫെബ്രുവരി 22നാണ്​ മുംബൈയിലെ ഹോട്ടൽ സീ ഗ്രീനിൽ തൂങ്ങി മരിച്ച നിലയിൽ കണ്ടെത്തിയത്​. സംഭവ സ്​ഥലത്തുനിന്നും ലഭിച്ച 15 പേജ്​ ആത്മഹത്യാക്കുറിപ്പിൽ ത​ന്‍റെ മരണത്തി​ന്‍റെ മുഖ്യകാരണക്കാരനായി അദ്ദേഹം ആരോപിച്ചിരിക്കുന്നത്​ പ്രഫുൽ പ​ട്ടേലി​ന്‍റെ പേരാണ്​.

ത​ന്‍റെ അച്ഛൻ ആത്മഹത്യക്ക് മുംബൈ തെരഞ്ഞെടുത്തത് കൊണ്ടാണ് ആത്മഹത്യ കുറിപ്പെങ്കിലും പുറത്ത് വന്നതെന്ന് മോഹൻ ഭായിയുടെ മകൻ പറയുന്നു. ദമൻ-ദിയു മുൻ കലക്​ടറും മലയാളിയുമായ കണ്ണൻ ഗോപിനാഥുമായുള്ള പ്രഫുൽ പ​ട്ടേലി​ന്‍റെ ഉരസലുകളും അന്ന്​ വാർത്തകളിൽ നിറഞ്ഞിരുന്നു. ദാദ്ര നഗർ ഹവേലിയുടെ തലസ്ഥാനമായ സിൽവാസയുടെ കലക്​ടറായിരുന്നു കണ്ണൻ ഗോപിനാഥൻ. തെരെഞ്ഞടുപ്പ് ചട്ടം ലംഘിച്ചു എന്നാരോപിച്ച്​ മോഹൻ ഭായിക്ക് നോട്ടീസ് നൽകാൻ കണ്ണൻ ഗോപിനാഥന് മേൽ പ്രഫുൽ പട്ടേൽ സമ്മർദം ചെലുത്തി. ഇത്​ പിന്നീട്​ വൻ വിവാദമായിരുന്നു. ദമൻ-ദിയുവിൽ ആദിവാസികളായിരുന്നു പ്രഫുൽ ഖോഡയുടെ ഇരകളെങ്കിൽ ലക്ഷദ്വീപിൽ ന്യൂനപക്ഷം എന്നു മാത്രം.