പ്രതിപക്ഷ നേതാവ് വി.ഡി. സതീശനെതിരെ കൊച്ചിയിൽ പോസ്​റ്റർ

കൊച്ചി: പ്രതിപക്ഷ നേതാവ് വി.ഡി. സതീശനെതിരെ എറണാകുളം ഡി.സി.സി ഓഫിസിന് മുന്നിലെ മതിലിൽ പോസ്​റ്ററുകൾ. മുതിർന്ന നേതാക്കളെ അവഗണിക്കുന്ന സതീശ​െൻറ പൊയ്മുഖം തിരിച്ചറിയണമെന്നും ഗ്രൂപ്പില്ലെന്ന് പറഞ്ഞ് സതീശൻ പുതിയ ഗ്രൂപ് ഉണ്ടാക്കുകയാണെന്നുമാണ് 'യഥാർഥ കോൺഗ്രസ് പ്രവർത്തകൻ' എന്ന പേരിലുള്ള പോസ്​റ്ററിലെ ആരോപണങ്ങൾ.

പാർട്ടിക്കായി ജീവിതം ഹോമിച്ച ഉമ്മൻ ചാണ്ടി, രമേശ് ചെന്നിത്തല, വി.എം. സുധീരൻ എന്നീ മുതിർന്ന നേതാക്കളെ അവഗണിക്കുന്ന വി.ഡി. സതീശ​െൻറ പൊയ്മുഖം തിരിച്ചറിയുക, ജില്ലയിൽ കോൺഗ്രസിന് സീറ്റുകൾ നഷ്​ടപ്പെട്ടാലും വേണ്ടില്ല, ത​െൻറ ഗ്രൂപ്പുകാരൻ തന്നെ ജില്ല കോൺഗ്രസ് പ്രസിഡൻറ് ആകണമെന്ന വി.ഡി. സതീശ​െൻറ പിടിവാശിയും മർക്കടമുഷ്​ടിയും അവസാനിപ്പിക്കുക, സ്വന്തം ഗ്രൂപ്പുകാരനെ ഡി.സി.സി പ്രസിഡൻറാക്കാൻ കിണഞ്ഞുശ്രമിക്കുന്ന വി.ഡി. സതീശ​െൻറ ഗ്രൂപ് കളി അവസാനിപ്പിക്കുക, രക്ഷക​െൻറ മുഖംമൂടി അണിഞ്ഞ് തന്ത്രപരമായി പുത്തൻ ഗ്രൂപ്പുണ്ടാക്കി കോൺഗ്രസ് പ്രസ്ഥാനത്തെ നശിപ്പിക്കുന്ന അഭിനവ തുഗ്ലക്ക് വി.ഡി. സതീശനെ തിരിച്ചറിയുക എന്നിങ്ങനെയാണ് ബുധനാഴ്​ച രാവിലെ പ്രത്യക്ഷപ്പെട്ട പോസ്​റ്ററുകളിലെ വാചകങ്ങൾ.

ജില്ല കോൺഗ്രസ് അധ്യക്ഷന്മാരുടെ പട്ടിക പ്രഖ്യാപിക്കുന്നതിന് മുമ്പുള്ള നിർണായക ചർച്ച നടക്കുന്നതിനിടെയാണ് പോസ്​റ്ററുകൾ പ്രത്യക്ഷപ്പെട്ടത്. പിന്നീട് പോസ്​റ്ററുകൾ നീക്കം ചെയ്തു. പ്രവർത്തകർ സി.സി.ടി.വി കാമറ ദൃശ്യങ്ങൾ പരിശോധിച്ചപ്പോൾ രാത്രി പോസ്​റ്റർ ഒട്ടിക്കുന്നത് കാണുന്നുണ്ടെങ്കിലും ആരാണെന്ന് വ്യക്തമായിട്ടില്ല.