രാഷ്​ട്രീയവിവാദം; സേവാഭാരതിയുടെ കോവിഡ്​ റിലീഫ്​ ഏജൻസി പദവി റദ്ദാക്കി

കണ്ണൂർ: കടുത്ത രാഷ്​ട്രീയവിവാദത്തെ തുടർന്ന്​ സേവാഭാരതിയുടെ കോവിഡ്​ റിലീഫ്​ ഏജൻസി പദവി റദ്ദാക്കി. ദുരന്തനിവാരണ അതോറിറ്റിയുടെ ജില്ല ചെയർമാനായ ജില്ല കലക്​ടറാണ്​ സേവാഭാരതിയെ കോവിഡ്​ റിലീഫ്​ ഏജൻസിയായി പ്രഖ്യാപിച്ച്​ കഴിഞ്ഞയാഴ്ച ഉത്തരവിറക്കിയത്​. ഇത്​ ഏറെ വിവാദങ്ങൾക്കും ചർച്ചകൾക്കും വഴിതെളിയിച്ചിരുന്നു. സി.പി.എമ്മി​െൻറ കീഴിലുള്ള സേവനവിഭാഗമായ ഐ.ആർ.പി.സി (ഇനിഷ്യേറ്റിവ്​ ഫോർ റിഹാബിലിറ്റേഷൻ ആൻഡ്​ പാലിയേറ്റിവ്​ കെയർ), മുസ്​ലിം ലീഗി​െൻറ കീഴിലുള്ള സി.എച്ച്​ സെൻറർ തുടങ്ങിയവയാണ്​ നിലവിൽ ജില്ലയിൽ കോവിഡ്​ പ്രതിരോധ പ്രവർത്തനങ്ങളുടെ റിലീഫ്​ ഏജൻസിയായി പ്രവർത്തിക്കുന്ന സംഘടനകൾ.

ഇതിൽ ഐ.ആർ.പി.സി, സി.എച്ച്​ സെൻറർ തുടങ്ങിയ സംഘടനകൾ ജീവകാരുണ്യ പ്രവർത്തനങ്ങളിൽ ജില്ലയിൽ സജീവവും പൊതുസ്വീകാര്യതയുമുള്ള സംഘടനകളാണ്​​. ആർ.എസ്​.എസി​െൻറ ദേശീയതലത്തിലുള്ള സേവനവിഭാഗമായ​ സേവാഭാരതി ജില്ലയിൽ അത്ര സജീവമല്ല. ഇതാണ്​ വിവാദത്തിനും ചർച്ചകൾക്കും​ വഴിതെളിച്ചത്​. എതിർപ്പ്​ രൂക്ഷമായതോടെ ഇത്തരവിറക്കിയ കലക്​ടർ സമ്മർദത്തിലായി. കഴിഞ്ഞ ദിവസം ചേർന്ന ജില്ല ദുരന്തനിവാരണ അതോറിറ്റിയുടെ യോഗത്തിലാണ്​ പദവി റദ്ദാക്കാൻ തീരുമാനിച്ചത്​.

കോവിഡ്​ പ്രതിരോധത്തിനുള്ള ആയുഷ്​ മരുന്ന്​ വിതരണത്തിന്​ സേവാഭാരതിയെ ചുമലപ്പെടുത്തിയ കേന്ദ്രസർക്കാർ ഉത്തരവ്​ വിവാദമായതിനിടയിലാണ്​ കണ്ണൂരിൽ സേവാഭാരതിക്ക്​ കോവിഡ്​ റിലീഫ്​ ഏജൻസി പദവി നൽകിയത്​.