പി.എം കിസാന്‍ പദ്ധതിയുടെ പേരിൽ വാട്സാപ്പിൽ മെസ്സേജ് വന്നോ? തുറക്കും മുമ്പ് ഒന്ന് ശ്രദ്ധിക്കണം

തിരുവനന്തപുരം: കര്‍ഷകര്‍ക്കായി കേന്ദ്ര സര്‍ക്കാര്‍ നടപ്പാക്കുന്ന പി.എം കിസാന്‍ പദ്ധതിയുടെ പേരിലും സൈബര്‍ തട്ടിപ്പിന്​ വ്യാപക ശ്രമമെന്ന്​ മുന്നറിയിപ്പ്. 2018 മുതല്‍ രാജ്യത്ത്​ നടപ്പാക്കുന്ന ‘പി.എം കിസാന്‍’ പദ്ധതി വഴി കര്‍ഷകര്‍ക്ക് സാമ്പത്തിക സഹായം നല്‍കിവരുന്നുണ്ട്. പദ്ധതിയുടെ പേരില്‍ കര്‍ഷകരെയും ഭൂ ഉടമകളെയും ലക്ഷ്യമിട്ടാണ് സൈബര്‍ തട്ടിപ്പ്.

വാട്‌സ്​ആപ്പിലൂടെ പി.എം കിസാന്‍ യോജനയെ കുറിച്ച് വിവരിക്കുന്ന സന്ദേശവും ഒപ്പം ഒരു ആപ്ലിക്കേഷന്‍ ഫയലും ലഭിക്കും. പണം തുടര്‍ന്ന്​ ലഭിക്കണമെങ്കില്‍ എ.പി.കെ ഫയല്‍ ഇന്‍സ്റ്റാള്‍ ചെയ്യാന്‍ ആവശ്യപ്പെടും. ഈ ഫയല്‍ ഇന്‍സ്റ്റാള്‍ ചെയ്യുന്നതോടെ ആപ്​ എസ്.എം.എസ് അനുമതി നല്‍കാന്‍ ആവശ്യപ്പെടും. അനുമതി നല്‍കിയാൽ എസ്.എം.എസ് നിരീക്ഷിക്കാനും ഒ.ടി.പി ആക്‌സസ് ചെയ്യാനും തട്ടിപ്പുകാര്‍ക്ക്​ കഴിയും. ഇതുവഴി തട്ടിപ്പുകാർക്ക്​ ബാങ്ക് അക്കൗണ്ടില്‍നിന്ന് പണം പിന്‍വലിക്കാനാകുമെന്ന്​ സൈബര്‍ പൊലീസ് പറയുന്നു.

സമൂഹമാധ്യമങ്ങളിലൂടെ ലഭിക്കുന്ന എ.പി.കെ ഫയലുകള്‍ ഡൗണ്‍ലോഡ് ചെയ്യുകയോ ലിങ്കുകളില്‍ ക്ലിക്ക് ചെയ്യുകയോ ചെയ്യരുത്​. വിശ്വാസയോഗ്യമായ ഉറവിടങ്ങളില്‍നിന്ന് മാത്രമേ ആപ്പുകള്‍ ഇന്‍സ്റ്റാള്‍ ചെയ്യാവൂ. ഇത്തരം സാമ്പത്തിക കുറ്റകൃത്യങ്ങള്‍ ശ്രദ്ധയിൽപെട്ടാല്‍ ഉടന്‍ 1930 എന്ന സൗജന്യ നമ്പറിലോ https://cybercrime.gov.in എന്ന വെബ്‌സൈറ്റ് മുഖേനയോ സൈബര്‍ പൊലീസിനെ വിവരം അറിയിക്കണമെന്നും നിര്‍ദേശമുണ്ട്​.