പൊലീസിൻെറ എടാ, എടീ വിളികൾ പൊതുജനത്തോട്​ വേണ്ട -ഹൈകോടതി

കൊച്ചി: പൊലീസി​െൻറ എടാ, എടീ വിളികൾ പൊതുജനത്തോട്​ വേണ്ടെന്ന്​ ഹൈകോടതി. പൊലീസിന്​ മുന്നിലെത്തുന്നവരെല്ലാം പ്രതികളല്ല. അവരോട്​ പ്രതികളോടെന്നപോലെ പെരുമാറരുത്​. തെറ്റ്​ ചെയ്തവർക്കെതിരെപോലും നിയമപരമായ നടപടിയെടുക്കാൻ മാത്രമാണ് പൊലീസിന് അധികാരമുള്ളത്. പൊലീസി​െൻറ മോശം പെരുമാറ്റം സഹിക്കേണ്ട ബാധ്യത പൊതുജനത്തിനില്ല. അതിനാൽ, പൊലീസി​െൻറ പെരുമാറ്റം മെച്ചപ്പെടുത്തണമെന്നും ജനങ്ങളോട്​ മാന്യമായി പെരുമാറണമെന്നും ജസ്​റ്റിസ്​ ദേവൻ രാമച​ന്ദ്രൻ വ്യക്തമാക്കി.

കോവിഡ് പ്രോട്ടോകോൾ ലംഘനത്തി​െൻറ പേരിൽ തന്നെയും മകളെയും തൃശൂർ ചേർപ്പ്​ പൊലീസ്​ അപമാനിച്ചെന്നാരോപിച്ച്​ വ്യാപാരിയായ അനിൽ നൽകിയ ഹരജി പരിഗണിക്ക​െവയാണ്​ സിംഗിൾ ബെഞ്ചി​െൻറ​ ഈ നിരീക്ഷണം​. പൊതുജനങ്ങളോട്​ പൊലീസ്​ മാന്യമായി പെരുമാറണമെന്ന് നിർദേശിച്ച് സംസ്ഥാന പൊലീസ് മേധാവി സർക്കുലർ ഇറക്കണമെന്നും സിംഗിൾ ബെഞ്ച് നിർദേശിച്ചു.

ചേർപ്പിലെ വ്യാപാര സ്ഥാപനത്തിലെത്തിയ എസ്.ഐ മകളോട്​ മോശമായി പെരുമാറിയെന്നും തങ്ങളെ അസഭ്യം പറഞ്ഞ് അപമാനിച്ചെന്നുമാണ്​ ഹരജിയിലെ ആരോപണം. മുമ്പ്​ ഹരജി പരിഗണിച്ച കോടതി ഇക്കാര്യത്തിൽ തൃശൂർ ജില്ല പൊലീസ് മേധാവിയിൽനിന്ന് സംഭവം സംബന്ധിച്ച്​ റിപ്പോർട്ട് തേടിയിരുന്നു. ഹരജിക്കാരനും മകളും കോവിഡ് പ്രോ​േട്ടാകോൾ ലംഘിച്ചെന്ന് റിപ്പോർട്ടിലുണ്ടെങ്കിലും തെളിവുകൾ ഹാജരാക്കിയിട്ടില്ലെന്ന്​ കോടതി ചൂണ്ടിക്കാട്ടി.

സംഭവം നടക്കുമ്പോൾ വ്യാപാരസ്ഥാപനം ഉൾപ്പെടുന്ന പ്രദേശം കണ്ടെയ്ൻമെൻറ്​ സോൺ ആയിരുന്നോ, ലോക്ഡൗൺ നിലവിലുണ്ടായിരുന്നോ തുടങ്ങിയ വിവരങ്ങളും റിപ്പോർട്ടിലില്ല. മോശമായി സംസാരിച്ചെന്ന ചേർപ്പ് എസ്.ഐക്കെതിരായ പരാതിയെക്കുറിച്ച്​ റിപ്പോർട്ടിൽ പരാമർശംപോലുമില്ല. ഇക്കാര്യങ്ങൾ ചൂണ്ടിക്കാട്ടി അഡീഷനൽ റിപ്പോർട്ട് നൽകാൻ ആഗസ്​റ്റ്​ 25ന്​ ജില്ല പൊലീസ് മേധാവിക്ക്​ നിർദേശം നൽകി.

കഴിഞ്ഞ ദിവസം അധിക റിപ്പോർട്ട്​ കോടതിക്ക്​ സമർപ്പിച്ചിട്ടുണ്ട്​. വെള്ളിയാഴ്​ച വീണ്ടും ഹരജി പരിഗണിക്ക​െവ, വ്യാപകമായ പൊലീസ്​ അതിക്രമങ്ങൾ ചൂണ്ടിക്കാട്ടി കോടതി പ്രതികരിക്കുകയായിരുന്നു. കോവിഡ് പ്രോട്ടോ​േകാൾ ലംഘനത്തി​െൻറ പേരിൽ സംസ്ഥാനത്ത് പൊലീസ് അതിക്രമം വ്യാപകമാണെന്ന പരാതി പെരുകുന്നതായും കോടതി ചൂണ്ടിക്കാട്ടി.