പാലക്കാട്​ ദമ്പതികൾ വിറ്റ കുഞ്ഞിനെ ഇൗറോഡിൽ നിന്ന്​ കണ്ടെത്തി

പാലക്കാട്: കുനിശ്ശേരിയില്‍ ദമ്പതികൾ പണത്തിനുവേണ്ടി വിറ്റ കുഞ്ഞിനെ കണ്ടെത്തി. തമിഴ്‌നാട് ഈറോഡില്‍ നിന്നാണ്​ കുഞ്ഞിനെ കണ്ടെത്തിയത്​. കുഞ്ഞിനെ വാങ്ങിയ ആളെ പൊലീസ്​ അറസ്റ്റ് ചെയ്തു. തമിഴ്നാട് ഈറോഡ് സ്വദേശി ജനാർദ്ദനൻ ആണ് പിടിയിലായത്. കുഞ്ഞിനെ മലമ്പുഴ ആനന്ദ് ഭവനിലേക്ക് മാറ്റി

കുനിശ്ശേരി കണിയാർകോട് താമസിക്കുന്ന ബിന്ദു രാജൻ ദമ്പതികളുടെ മൂന്നു ദിവസം പ്രായമുളള പെണ്‍കുഞ്ഞിനെ ഡിസംബർ 29നാണ്​ വിറ്റത്. യുവതിയും പൊള്ളാച്ചി സ്വദേശിയായ ഭര്‍ത്താവും ഭര്‍തൃമാതാവും ചേര്‍ന്നാണ് കുഞ്ഞിനെ വിറ്റത്. ഭര്‍ത്തൃമാതാവി​​​െൻറ പരിചയത്തിലുളള പൊളളാച്ചിയിലുളളവര്‍ക്ക് ഒരു ലക്ഷം രൂപക്ക്​ കുഞ്ഞിനെ വിറ്റെന്ന് മാത്രമേ അറിയൂവെന്നായിരുന്നു ബിന്ദു പൊലീസിനോട്​ പറഞ്ഞിരുന്നത്​. 

കഴിഞ്ഞ ക്രിസ്​മസ് ദിനത്തിലാണ് യുവതി ജില്ലാ ആശുപത്രിയില്‍ പെണ്‍കുഞ്ഞിന് ജന്മം നല്‍കിയത്. ഇവര്‍ക്ക് മറ്റു നാലു കുട്ടികള്‍കൂടിയുണ്ട്. കുഞ്ഞുങ്ങളെ വളര്‍ത്താനുള്ള സാമ്പത്തിക ബുദ്ധിമുട്ടിനെ തുടര്‍ന്ന്​ ഭർത്താവി​​​െൻറയും ഭര്‍തൃമാതാവി​​​െൻറയും ആവശ്യപ്രകാരം ഈറോഡില്‍ വില്പന നടത്തുകയായിരുന്നു.

കുഞ്ഞിശനയും കൊണ്ട്​ പൊള്ളാച്ചിയിലേക്ക്​ പോയ യുവതി കുഞ്ഞില്ലാതെ തിരിച്ചെത്തിയപ്പോള്‍ പ്രദേശവാസികള്‍ അങ്കണവാടി അധികൃതരെ വിവരം അറിയിക്കുകയായിരുന്നു. തുടര്‍ന്ന് സാമൂഹ്യനീതി വകുപ്പ് ഇടപെട്ടാണ് പൊലീസില്‍ പരാതി നല്‍കിയത്.