തന്നെ ഒതുക്കിയെന്ന ആരോപണം അടിസ്ഥാനരഹിതം, കെ.ടി.ഡി.സി ജനകീയവത്​കരിക്കും -പി.കെ. ശശി

പാലക്കാട്​: പാർട്ടി ഭാരവാഹിത്വത്തിലേക്ക്​ എത്താതിരിക്കാൻ പദവി നൽകി ഒതുക്കി എന്ന ആരോപണം അടിസ്ഥാനരഹിതമാണെന്ന്​ കെ.ടി.ഡി.സി ചെയർമാൻ പി.കെ. ശശി. തന്നോട്​ പാർട്ടി നീതികേട്​ കാണിച്ചിട്ടില്ല. പാലക്കാട്​ പ്രസ്​ക്ലബ്​ സംഘടിപ്പിച്ച മീറ്റ് ​ദ പ്രസിൽ സംസാരിക്കുകയായിരുന്നു അദ്ദേഹം.

കെ.ടി.ഡി.സി ചെയർമാൻ സ്ഥാനം ചെറിയ ഉത്തരവാദിത്തമല്ലെന്നാണ്‌ കരുതുന്നത്​. വിഭാഗീയത പാർട്ടിക്ക്​ ഉണ്ടാക്കിയ പരിക്ക്‌ മാരകമായിരുന്നു. അത്‌ പരിഹരിക്കാനായി. കെ.ടി.ഡി.സിയിൽ വേണ്ടത്ര ജനകീയവത്​കരണം നടന്നിട്ടില്ല. അധികാരമേറ്റെടുത്ത ശേഷം ഇതുമായി ബന്ധപ്പെട്ട്​ ആശയങ്ങൾ സർക്കാറിൽ അവതരിപ്പിച്ചിരുന്നു. നിലവിൽ കെ.ടി.ഡി.സിക്ക്‌ കാര്യമായ സാന്നിധ്യമില്ലാത്ത മലബാറിലേക്ക്‌‌ കെ.ടി.ഡി.സി ശൃംഖല വിപുലീകരിക്കാൻ താൽപര്യമെടുക്കും. സമൂഹത്തിലെ മധ്യവർഗത്തിന്​ മുകളിലേക്കുള്ളവർക്ക്​ മാത്രം പ്രാപ്യമായതാണ്​ കെ.ടി.ഡി.സി എന്ന ധാരണയുണ്ട്​. ഇത്​ മാറ്റും. കുറഞ്ഞ ​െചലവിൽ ഭക്ഷണം ലഭ്യമാക്കുന്ന 'ആഹാർ' പോലുള്ള പദ്ധതി കൂടുതൽ വ്യാപകമാക്കും.

ദേശീയ -സംസ്ഥാന പാതയോരങ്ങളിലെ സർക്കാർ ഭൂമിയിൽ അനുയോജ്യമായ സ്ഥലങ്ങൾ ഏറ്റെടുത്ത്​ അടിസ്ഥാന സൗകര്യങ്ങളൊരുക്കുന്നത്​ യാത്രക്കാർക്ക്​ ഉപകാരപ്രദമാവും. വിഷയം സർക്കാറിന്​ മുന്നിലുണ്ട്​. പൊതുമരാമത്ത്‌ വകുപ്പി​െൻറ ചില വിശ്രമകേന്ദ്രങ്ങളെങ്കിലും കെ.ടി.ഡി.സിയെ ഏൽപിക്കാൻ സർക്കാറിനോട്‌ ആവശ്യപ്പെട്ടിട്ടുണ്ട്‌. ഫ്ലോട്ടിങ്​ റസ്​റ്റാറൻറ്​ അടക്കമുള്ള ആശയങ്ങൾ വിപുലീകരിക്കാനും പദ്ധതിയുണ്ട്‌. ഉത്തരവാദിത്ത ടൂറിസം പ്രോത്സാഹിപ്പിക്കുന്നതിലൂടെ പാലക്കാടി​െൻറ സാധ്യതകൾ പരിശോധിച്ച്​ പദ്ധതി തയാറാക്കും. ഇതടക്കം പദ്ധതികൾ ചർച്ച ചെയ്യാൻ 23ന്​ ഉന്നതതല യോഗം ചേരുമെന്നും പി.കെ. ശശി പറഞ്ഞു.