കരുവന്നൂർ ബാങ്ക് കേസ്: പി.കെ. ബിജുവിനെയും എം.എം. വർഗീസിനെയും ഇ.ഡി ചോദ്യം ചെയ്ത് വിട്ടയച്ചു

കൊച്ചി: 300 കോടിയുടെ ബിനാമി വായ്പ തട്ടിപ്പു കണ്ടെത്തിയ കരുവന്നൂർ ബാങ്ക് കേസിൽ സി.പി.എം സംസ്ഥാന സെക്രട്ടേറിയറ്റ് അംഗവും മുൻ എം.പിയുമായ പി.കെ. ബിജു, തൃശൂർ ജില്ല സെക്രട്ടറി എം.എം. വർഗീസ്​, ജില്ല സെക്രട്ടേറിയറ്റ്​ അംഗവും തൃശൂർ നഗരസഭ കൗൺസിലറുമായ പി.കെ. ഷാജൻ എന്നിവരെ ഇ.ഡി തിങ്കളാഴ്ചയും ചോദ്യംചെയ്​​ത്​ വിട്ടയച്ചു. രാവിലെ 10.30 ന്​ കൊച്ചിയിലെ ഇ.ഡി ഓഫിസിലെത്തിയ ബിജുവിന്റെ അടക്കം ചോദ്യംചെയ്യൽ വൈകീട്ട്​ ഏഴോടെയാണ്​ അവസാനിച്ചത്​.

പാർട്ടിയുടെ ആസ്തിവിവരങ്ങൾ ഹാജരാക്കാൻ ഇ.ഡി നിർദേശിച്ചിട്ടുണ്ടെന്നും വിവരങ്ങൾ കൈമാറുമെന്നും ചോദ്യംചെയ്യലിനുശേഷം പുറത്തിറങ്ങിയ എം.എം. വർഗീസ്​ മാധ്യമങ്ങളോട്​ പറഞ്ഞു. പി.കെ. ബിജുവിനോട്​ വ്യാഴാഴ്ചയും എം.എം. വർഗീസിനോട്​ ഏപ്രിൽ 22നും വീണ്ടും ഹാജരാകാൻ ആവശ്യപ്പെട്ടിട്ടുണ്ട്​. കഴിഞ്ഞ ദിവസങ്ങളിൽ ഹാജരായ ബിജുവിനെയും വർഗീസിനെയും വീണ്ടും വിളിപ്പിക്കുകയായിരുന്നു​.

കരുവന്നൂർ ബാങ്ക് തട്ടിപ്പിൽ പാർട്ടി നിയോഗിച്ച അന്വേഷണ കമീഷനിൽ അംഗമായിരുന്ന ബിജുവിന്റെയും ഷാജന്‍റെയും മൊഴികൾ കേസന്വേഷണത്തിൽ നിർണായകമാണ്. മുഖ്യപ്രതി പി. സതീഷ് കുമാർ ഒരു എം.പിയുടെയും എം.എൽ.എയുടെയും ബിനാമിയാണെന്ന ഗുരുതര ആരോപണം ഈ കേസിൽ വിചാരണക്കോടതി മുമ്പാകെ അന്വേഷണസംഘം ഉന്നയിച്ചിരുന്നു.

തട്ടിപ്പിനെക്കുറിച്ച്​ സി.പി.എം അന്വേഷണം നടത്തി റിപ്പോർട്ട്​ തയാറാക്കിയതായി വിവരം​ ലഭിച്ചതോടെയാണ്​ ഈ വഴിക്ക്​ ഇ.ഡി അന്വേഷണം. പാർട്ടി കണ്ടെത്തൽ ചോദിച്ചറിയുന്നതിനടക്കമാണ്​ നേതാക്കളെ ചോദ്യംചെയ്യുന്നത്​. ജില്ലയി​ലെ പാർട്ടിയുടെ സ്വത്ത്​ വിവരങ്ങളും​ തേടി. വിവിധ ബാങ്കുകളിലായി പാർട്ടിക്ക്​ അഞ്ച്​ അക്കൗണ്ടുകളുണ്ടെന്ന കണ്ടെത്തൽ സംബന്ധിച്ചും ചോദ്യമുനയിലാണ്​ നേതാക്കൾ. ഇത്തരത്തിൽ പാർട്ടിയുമായി ബന്ധപ്പെട്ട്​ അക്കൗണ്ടുകളില്ലെന്നും ലോക്കൽ കമ്മിറ്റികളുടെ അക്കൗണ്ട്​ സംബന്ധിച്ച്​ തനിക്ക്​ വിവരമില്ലെന്നുമാണ്​ ആറാംതവണ ഹാജരായ വർഗീസ്​ മൊഴിയിൽ ആവർത്തിക്കുന്നത്​.