കോവിഡിന്‍റെ രണ്ടാം തരംഗം നേരിടാൻ കേരളം സുസജ്ജം; കൂടുതൽ നിയന്ത്രണങ്ങൾ പ്രഖ്യാപിച്ച്​ മുഖ്യമന്ത്രി

തിരുവനന്തപുരം: കോവിഡിന്‍റെ രണ്ടാം തരംഗം നേരിടാൻ കൂടുതൽ സുസജ്ജമായ സജ്ജീകരണങ്ങളാണ്​ കേരളത്തിൽ ഒരുക്കിയിരിക്കുന്നതെന്ന്​ മുഖ്യമന്ത്രി പിണറായി വിജയൻ. സംസ്ഥാനത്ത്​ ഓക്​സിജൻ ദൗർലഭ്യമില്ല. ഐ.സി.യു, വെന്‍റിലേറ്റർ സൗകര്യങ്ങളും ആവശ്യത്തിനുണ്ടെന്നും പിണറായി വ്യക്​തമാക്കി. കോവിഡ്​ പ്രതിരോധത്തിന്‍റെ ഭാഗമായി കൂടുതൽ നിയന്ത്രണങ്ങളും മുഖ്യമന്ത്രി പ്രഖ്യാപിച്ചു.

സർക്കാർ ജീവനക്കാരിലെ 50 ശതമാനം പേർക്ക്​ റോ​േട്ടഷൻ അടിസ്ഥാനത്തിൽ വർക്ക്​ ഫ്രെം ഹോം ഏർപ്പെടുത്തും. സ്വകാര്യ മേഖലയിലും വർക്ക്​ ഫ്രെം ഹോം നടപ്പാക്കാൻ സ്ഥാപന മേധാവികൾ ശ്രദ്ധിക്കണം. ഏപ്രിൽ 24 ശനിയാഴ്ച സർക്കാർ ഓഫീസുകൾ, പൊതുമേഖല സ്ഥാപനങ്ങൾ, സഹകരണ സ്ഥാപനങ്ങൾ എന്നിവക്ക്​ അവധിയായിരിക്കും. ഹയർ സെക്കൻഡറി പരീക്ഷ സാധാരണ പോലെ നടക്കും.

ഈ ശനിയാഴ്ചയും ഞായറാഴ്ചയും അവശ്യ സർവീസുകൾ മാത്രമാവും ഉണ്ടാവുക. കല്യാണം, ഗൃഹപ്രവേശം തുടങ്ങിയ ചടങ്ങുകൾ മുൻനിശ്​ചയിച്ച പ്രകാരം നടക്കും. 75 പേർക്കാണ്​ ചടങ്ങിൽ പ​ങ്കെടുക്കാൻ അവസരം. നോമ്പിന്‍റെ ഭാഗമായുള്ള പ്രാർഥനകൾ പ്രോ​ട്ടോകോൾ പാലിച്ച്​ നടത്തുന്നതിന്​ രാത്രി കർഫ്യുവിൽ ഇളവ്​ അനുവദിക്കുമെന്നും അദ്ദേഹം പറഞ്ഞു.

ഇത്തവണ Crush the Curve എന്ന നയമാണ്​ സർക്കാർ സ്വീകരിക്കുന്നത്​. കൂട്ടംചേർന്നുള്ള പരിപാടികൾ പരമാവധി ഒഴിവാക്കണം. നടത്തുന്നവ കോവിഡ്​ പ്രോ​ട്ടോകോൾ കർശനമായി പാലിച്ചാണ്​ നടത്തേണ്ടത്​. അടഞ്ഞ സ്ഥലങ്ങളിൽ ആളുകൾ കൂട്ടം ചേരുന്നത്​ ഒഴിവാക്കണമെന്നും അദ്ദേഹം പറഞ്ഞു.

വാക്​സിൻ ദൗർലഭ്യമാണ്​ കേരളം നേരിടുന്ന പ്രതിസന്ധി. ഇത്​ കേന്ദ്രസർക്കാറിനെ അറിയിച്ചിട്ടുണ്ട്​. വാക്​സിൻ പാഴാക്കാതെ പരമാവധി പേർക്ക്​ നൽകാൻ സാധിച്ചിട്ടുണ്ട്​. കേന്ദ്രത്തിന്‍റെ പുതിയ വാക്​സിൻ നയം കേരളത്തിന്​ തിരിച്ചടിയാണെന്നും പിണറായി പറഞ്ഞു.

ഒരു താലൂക്കിൽ ഒരു സി.എഫ്​.എൽ.ടി.സിയെങ്കിലും തുടങ്ങും. സി.എഫ്​.എൽ.ടി.സി ഇല്ലാത്ത സ്ഥലങ്ങളിൽ ഉടൻ അത്​ തുടങ്ങും. കോവിഡ്​ ആശുപത്രികൾ നിരീക്ഷിക്കാൻ ടാസ്​ക്​ ഫോഴ്​സുകൾ രൂപീകരിക്കും. പ്രയാസമില്ലാതെ ആളുകൾക്ക്​ വാക്​സിൻ എടുത്ത്​ പോവാനുള്ള സൗകര്യമൊരുക്കും. ഓൺലൈനിൽ ബുക്ക്​ ചെയ്​ത്​ അറിയിപ്പ്​ ലഭിച്ചവർ മാത്രം വാക്​സിൻ കേന്ദ്രത്തിലെത്താനുള്ള സൗകര്യമൊരുക്കുമെന്നും പിണറായി പറഞ്ഞു.

വീടുകളിൽ കോവിഡ്​ ബാധിച്ച്​ കഴിയുന്നവർക്ക്​ ആവശ്യമായ സഹായം തദ്ദേശസ്വയംഭരണ സ്ഥാപനങ്ങൾ എത്തിച്ച്​ നൽകണം. വാർഡുതല സമിതികൾ പുനരുജ്ജീവിപ്പിക്കണം.