പി.കെ. ശ്രീമതിയുടെ​ വിലക്ക്​ ശരിവെച്ച്​ പിണറായി; ‘എല്ലാ സെക്രട്ടേറിയറ്റ്​ യോഗങ്ങളിലും പ​ങ്കെടു​ക്കേണ്ട’

തിരുവനന്തപുരം: സി.പി.എം കേന്ദ്ര കമ്മിറ്റിയംഗം പി.കെ. ശ്രീമതിക്ക്​ പാർട്ടി സംസ്ഥാന സെക്രട്ടേറിയറ്റ്​ യോഗത്തിൽ പ​ങ്കെടുക്കുന്നതിലെ വിലക്ക്​ ശരിവെച്ച്​ മുഖ്യമന്ത്രി പിണറായി വിജയൻ. എല്ലാ സംസ്ഥാന സെക്രട്ടേറിയറ്റ്​ യോഗങ്ങളിലും ശ്രീമതിക്ക്​ പ​ങ്കെടുക്കാനാകില്ലെന്നും എന്നാൽ, സംസ്ഥാന സമിതി യോഗത്തിന്‍റെ ഭാഗമായി സെക്രട്ടേറിയറ്റ്​ യോഗം നടക്കുമ്പോൾ പ​ങ്കെടുക്കാമെന്നും വാർത്തസമ്മേളനത്തിൽ അദ്ദേഹം വിശദീകരിച്ചു. കഴിഞ്ഞ 19ന്​ നടന്ന സംസ്ഥാന സെക്രട്ടേറിയറ്റ്​ യോഗത്തിൽ പ​ങ്കെടുത്ത പി.കെ. ശ്രീമതിയെ മുഖ്യമന്ത്രി വിലക്കിയ വിവരം പുറത്തുവന്നിരുന്നു.

പി.കെ. ശ്രീമതിയെ ആരും വിലക്കിയിട്ടില്ലെന്നും സെക്രട്ടേറി​യറ്റ്​ യോഗങ്ങളിൽ പ​ങ്കെടുക്കാമെന്നുമാണ്​ ജനറൽ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദൻ എന്നിവർ വിശദീകരിച്ചത്​. കേരളത്തിലുള്ളപ്പോൾ സെക്രട്ടേറിയറ്റ്​ യോഗങ്ങളിൽ പ​ങ്കെടുക്കുമെന്ന്​ ശ്രീമതിയും വിശദീകരിച്ചു. എന്നാൽ, എല്ലാ സെക്രട്ടേറിയറ്റ്​ യോഗങ്ങളിലും ശ്രീമതിക്ക്​ പ​ങ്കെടുക്കാനാകില്ലെന്നാണ്​ പിണറായി വ്യക്തമാക്കിയത്.​ മൂവരുടെയും നിലപാടുകൾ​ വ്യത്യസ്തമാണ്​.

വിഷയത്തിൽ പിണറായി വിജയന്‍റെ വിശദീകരണം ഇങ്ങനെ: പ്രായപരിധി കർശനമായി നടപ്പാക്കിയതിനാലാണ്​ പി.കെ. ശ്രീമതിയെ സെക്രട്ടേറിയറ്റിൽനിന്ന്​ ഒഴിവാക്കിയത്​. മഹിള ​അസോസിയേഷൻ നേതാവെന്ന നിലയിൽ ഇതര സംസ്ഥാനങ്ങളിൽ മികച്ച പ്രകടനം നടത്തുന്ന പി.കെ. ശ്രീമതിക്ക്​ കേ​ന്ദ്ര കമ്മിറ്റിയിൽ തുടരാൻ ഇളവ്​ നൽകണമെന്ന്​ പാർട്ടി കോൺഗ്രസിൽ അഭിപ്രായം വന്നു. അതനുസരിച്ച്​ കേന്ദ്ര ക്വോട്ടയിൽ ഉൾപ്പെടുത്തി ഇളവ്​ നൽകി.

ഇതനുസരിച്ച്​ ​നിലവിൽ കേന്ദ്ര കമ്മിറ്റിയംഗമെന്ന നിലയിൽ സംസ്ഥാന സമിതി യോഗത്തിൽ പി.കെ. ശ്രീമതിക്ക്​ പ​ങ്കെടുക്കാം. എന്നാൽ, നേരത്തേയുണ്ടായിരുന്നതു​പോലെ ശ്രീമതിക്ക്​ സംസ്ഥാനത്ത്​ സംഘടന ചുമതലയില്ല. അതുകൊണ്ടുതന്നെ എല്ലാ സംസ്ഥാന സെക്രട്ടേറിയറ്റ്​ യോഗങ്ങളിലും പ​ങ്കെടുക്കേണ്ടതില്ല. സംസ്ഥാന സ​മിതിയുടെ ഭാഗമായുള്ള സെക്രട്ടേറിയറ്റ്​ യോഗത്തിൽ പ​ങ്കെടുക്കാവുന്നതാണെന്നും പിണറായി തുടർന്നു.