മുഖ്യമന്ത്രിയുടെ വിദേശയാത്ര: ഹരജിക്കാരൻ നേരി​ട്ടെത്തണമെന്ന്​ ഹൈകോടതി

കൊച്ചി: മുഖ്യമന്ത്രിയുടെ വിദേശയാത്രകളിൽ വിജിലന്‍സ് അന്വേഷണം ആവശ്യപ്പെട്ട ഹരജിക്കാരൻ നേരി​ട്ടെത്തി വിശദീകരണം നൽകണമെന്ന്​ ഹൈകോടതി. തമിഴ്​നാട്​ കന്യാകുമാരി മാര്‍ത്താണ്ഡം സ്വദേശി ഡി. ഫ്രാന്‍സിസിനോടാണ്​ ആഗസ്​റ്റ്​ ആറിന്​ നേരി​ട്ടെത്താൻ ജസ്​റ്റിസ്​ പി. ഉബൈദ്​ ഉത്തരവിട്ടത്​. കേസുമായി ബന്ധപ്പെട്ട രേഖകൾ വിവരാവകാശ നിയമ പ്രകാരം സംഘടിപ്പിച്ചതുമായി ബന്ധപ്പെട്ട്​ ആശയക്കുഴപ്പമുണ്ടായ സാഹചര്യത്തിലാണ്​ കൂടുതൽ വ്യക്​തതക്കായി ഹരജിക്കാരൻ നേരിട്ട്​ എത്തണമെന്ന്​ കോടതി നിർദേശിച്ചത്​. അതേസമയം, അഴിമതി നിരോധന നിയമ പ്രകാരം കേസെടുക്കാൻ മതിയായ വിഷയമ​ല്ല ഇതെന്ന്​ ചൂണ്ടിക്കാട്ടി വിജിലൻസ്​ കോടതിയിൽ വിശദീകരണം നൽകി.

2016 ഡിസംബറിൽ യു.എ.ഇയിലേക്കും 2018 ജൂലൈയിൽ അമേരിക്കയിലേക്കും മുഖ്യമന്ത്രി നടത്തിയ യാത്രകളുടെ ചെലവ് സംബന്ധിച്ചാണ്​ ഹരജിക്കാരൻ വിജിലൻസ്​ അന്വേഷണം ആവശ്യപ്പെട്ടിരിക്കുന്നത്​. കേസ് നല്‍കാന്‍ വേണ്ട രേഖകള്‍ വിവരാവകാശ നിയമപ്രകാരം സംഘടിപ്പിച്ചത് ഹരജിക്കാര​​െൻറ അഭിഭാഷകനാണെന്ന് കോടതി നേരത്തേ കണ്ടെത്തിയിരുന്നു. ഫ്രാന്‍സിസി​​െൻറ അനുമതി പത്രത്തി​​െൻറ അടിസ്ഥാനത്തിലാണ് വിവരാവകാശ നിയമപ്രകാരമുള്ള അപേക്ഷ നല്‍കിയതെന്ന് അഭിഭാഷകന്‍ അറിയിച്ചു.

വെള്ളിയാഴ്ച കേസ് പരിഗണിച്ചപ്പോള്‍ അനുമതി പത്രത്തി​​െൻറ അസ്സലാണ് അഭിഭാഷകന്‍ ഹാജരാക്കിയത്. വിവരാവകാശ നിയമപ്രകാരം അപേക്ഷ സ്വീകരിച്ച ഓഫിസിലല്ലേ അസ്സല്‍ അനുമതി പത്രം ഉണ്ടാവേണ്ടതെന്ന സംശയം കോടതി ഉന്നയിച്ചു. തുടർന്നാണ്​ ഇക്കാര്യത്തിൽ വ്യക്​തത വരുത്താനായി ഹരജിക്കാരനോട്​ നേരിട്ട്​ ഹാജരാകാൻ കോടതി നിർദേശിച്ചത്​.