തുടർചികിത്സക്കായി പിണറായി വിജയൻ വീണ്ടും അമേരിക്കയിലേക്ക്

തിരുവനന്തപുരം: മുഖ്യമന്ത്രി പിണറായി വിജയന്‍ തുടർ ചികിത്സക്കായി വീണ്ടും അമേരിക്കയിലേക്ക് പോകുന്നു. ഈ മാസം 23നാണ് മുഖ്യമന്ത്രി അമേരിക്കയിലേക്ക് പോകുന്നത്. മെയ് പകുതി വരെ മുഖ്യമന്ത്രി അമേരിക്കയില്‍ തുടരും. മുഖ്യമന്ത്രിയുടെ യാത്ര സംബന്ധിച്ച് ചീഫ് സെക്രട്ടറി ഉത്തരവിറക്കി.

അമേരിക്കയിലെ മയോ ക്ലിനിക്കിലാണ് മുഖ്യമന്ത്രിയുടെ ചികിത്സ. യാത്രക്കായി കേന്ദ്രസര്‍ക്കാരിനോട് അനുമതി തേടിയിട്ടുണ്ട്. ഇത് മൂന്നാം തവണയാണ് ചികിത്സാ ആവശ്യത്തിനായി അദ്ദേഹം അമേരിക്കയിലേക്ക് പോകുന്നത്. ഈ ​വ​ർ​ഷ​മാ​ദ്യം ജനുവരി 11 മുതൽ 26വരെ ചികിൽസക്കായി മുഖ്യമന്ത്രി അമേരിക്കയിൽ തങ്ങിയിരുന്നു.

ഭാര്യ കമലക്കും പേഴ്‌സണല്‍ അസിസ്റ്റന്റ് സുനീഷിനുമൊപ്പമാണ് ഇദ്ദേഹം അമേരിക്കയിലേക്ക് പോയത്. അതിനിടെ അമേരിക്കയിലെ മയോ ക്ലിനിക്കിലെ ചികിത്സക്ക് മുഖ്യമന്ത്രിക്ക് 29.82 ലക്ഷം രൂപ അനുവദിച്ച സർക്കാർ ഉത്തരവ് റദ്ദാക്കി. തുകയനുവദിച്ച് ഈ മാസം 13ന് പൊതുഭരണ വകുപ്പ് ഇറക്കിയ ഉത്തരവിൽ വസ്തുതാ പിഴവുണ്ടെന്നു കാണിച്ചാണ് റദ്ദാക്കിയത്.