‘വിഴിഞ്ഞവുമായി ബന്ധപ്പെട്ട് എൽ.ഡി.എഫിൽ​ ചില അഭിപ്രായ ഭിന്നതകളുണ്ടായിരുന്നു’; വികസനം വേണ്ടിടത്ത്​ അത്​ തടയുന്ന നിലപാട്​ സ്വീകരിക്കരുതെന്ന് മു​ഖ്യമന്ത്രി

ആലപ്പുഴ: വികസനം വേണ്ടിടത്ത്​ അത്​ തടയുന്ന നിലപാട്​ സ്വീകരിക്കരുതെന്ന്​ മുഖ്യമന്ത്രി പിണറായി വിജയൻ. സംസ്ഥാന സർക്കാറിന്‍റെ നാലാം വാർഷികാഘോഷത്തിന്റെ ഭാഗമായി ആലപ്പുഴ പാതിരപ്പള്ളി കാമിലോട്ട് കണ്‍വെന്‍ഷന്‍ സെന്ററില്‍ നടന്ന എന്‍റെ കേരളം ജില്ലതല സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ദേശീയപാത വികസനത്തിൽ നാടിന്‍റെ വികസനത്തിനൊപ്പം നിൽക്കാൻ യു.ഡി.എഫ്​ സർക്കാറിനായില്ല. 45 മീറ്റർ വീതിയിൽ റോഡ്​ നിർമിക്കാൻ കേരളം ഒ​റ്റക്കെട്ടായാണ്​ പറഞ്ഞത്​. കൂടെയുണ്ടായിരുന്ന ചിലയാളുകൾക്ക്​ തടസമുണ്ടായപ്പോൾ അന്നത്തെ യു.ഡി.എഫ്​ സർക്കാർ അതിന്​ തയാറായില്ല. ഗെയ്ൽ പദ്ധതിയിലും വികസന വിരുദ്ധ നിലപാട് സ്വീകരിച്ചു. പക്ഷേ, എൽ.ഡി.എഫ്​ അത്​ നടപ്പാക്കി.

വിഴിഞ്ഞം പദ്ധതിയുമായി ബന്ധപ്പെട്ട് എൽ.ഡി.എഫിൽ​ ചില അഭിപ്രായ ഭിന്നതകളുണ്ടായിരുന്നു. അത് നിലനിർത്തിയാണ്​ മുന്നോട്ട് പോയത്. യു.ഡി.എഫ്​ സർക്കാറിന്‍റെ കരാർ റദ്ദാക്കിയിരുന്നെങ്കിൽ നിയമപ്രശ്നങ്ങൾ ഉണ്ടാകുമായിരുന്നു. കരാറുമായി ബന്ധപ്പെട്ട് എൽ.ഡി.എഫ്​ മുന്നോട്ട് വെച്ച എല്ലാ ആശങ്കകളും ശരിയാണ്. എന്നിട്ടും പദ്ധതിക്ക്​ തുരങ്കം വെക്കാനല്ല നോക്കിയത്​. അത്​ നടപ്പാക്കാനാണ്​.

നിപ, ഓഖി, മഹാപ്രളയം, കോവിഡ്​ തുടങ്ങി ഒന്നിനു പിന്നാലെ മ​റ്റൊന്നായി ഒരുപാട്​ ദുരന്തങ്ങൾ സംസ്ഥാനത്തിന്​ ഏറ്റുവാങ്ങേണ്ടിവന്നു. പ്രതിസന്ധിഘട്ടത്തിൽ കേന്ദ്രവും സഹായിച്ചില്ല. സഹായിക്കാൻ വന്ന രാജ്യങ്ങളെയും തടഞ്ഞു. അർഹിക്കുന്ന സഹായം നൽകണമെന്ന് പറയാത്ത പ്രതിപക്ഷം ശത്രുത സമീപനം സ്വീകരിക്കുന്ന കേന്ദ്രസർക്കാറിനൊപ്പം നിന്നു. ഈ സമയം വിഷമിച്ച് തലയിൽ കൈയും വെച്ചിരിക്കുകയല്ല സർക്കാർ ചെയ്തത്.

ഇന്ന്​ എല്ലാം അതിജീവിച്ച കേരളത്തെ ലോകം അത്ഭുതത്തോടെ നോക്കുന്നു. നവകേരളം എന്നത് സങ്കൽപമല്ല, യാഥാർഥ്യമാണ്. കേരളത്തിന്‍റെ പ്രതിശീർഷ വരുമാനം കൂടി. സാമ്പത്തിക സ്ഥിതി മെച്ചപ്പെട്ടു. രാജ്യത്ത്​ ദാരിദ്ര്യം ഏറ്റവും കുറഞ്ഞ സംസ്ഥാനമാണ്​ കേരളം. നവംബർ ഒന്നിന്​ അതിദരിദ്രർ ഇല്ലാത്ത സംസ്ഥാനമായി മാറും. നവകേരള നിർമിതിയിലേക്ക് ഇനിയും മുന്നേറണമെന്നും പിണറായി വിജയൻ പറഞ്ഞു.