പിണറായി വിജയൻ കോണ്‍ഗ്രസി​െൻറ നാശം ആഗ്രഹിക്കുന്ന മൂന്നാമത്തെയാൾ ​ -കെ. മുരളീധരന്‍

തിരുവനന്തപുരം: നരേന്ദ്ര മോദിയും അമിത് ഷായും കഴിഞ്ഞാല്‍ രാജ്യത്ത്​ കോണ്‍ഗ്രസി​െൻറ നാശം ആഗ്രഹിക്കുന്ന മൂന്നാമത്തെയാൾ പിണറായി വിജയനെന്ന്​ കെ. മുരളീധരൻ എം.പി. അതുകൊണ്ടാണ്​ ദേശീയ തലത്തില്‍ കോണ്‍ഗ്രസ് സഹകരണത്തെ സി.പി.എം എതിര്‍ക്കുന്നത്​. കേന്ദ്ര കമ്മിറ്റിയില്‍ നടന്ന ചര്‍ച്ചയില്‍ കോൺഗ്രസ്​ സഹകരണം കേരളഘടകം എതിര്‍ത്തതിനെ വാർത്തസമ്മേളനത്തില്‍ വിമര്‍ശിക്കുകയായിരുന്നു കെ. മുരളീധരൻ.

അഖിലേന്ത്യാടിസ്ഥാനത്തില്‍ ബി.ജെ.പി ഇതര കക്ഷികളുടെ കേന്ദ്രബിന്ദു കോണ്‍ഗ്രസാണ്. കേരളത്തിലും സി.പി.എമ്മിനോട് കോണ്‍ഗ്രസിന് തൊട്ടുകൂടായ്മയില്ല. അവരുടെ അക്രമനയങ്ങളോടും മോദി സര്‍ക്കാറി​െൻറ കാര്‍ബണ്‍ കോപ്പി ആശയങ്ങളോടുമാണ് എതിര്‍പ്പ്.

നിലവില്‍ സി.പി.എമ്മി​െൻറ രണ്ടു എം.പിമാര്‍ തമിഴ്‌നാട്ടില്‍ കോണ്‍ഗ്രസിനൊപ്പം നിന്ന് ജയിച്ചവരാണെന്ന് ഓര്‍ക്കണം. പിണറായി വിജയന്‍ പകല്‍ കമ്യൂണിസ്​റ്റും രാത്രി ബി.ജെ.പിയുമാണ്. അദ്ദേഹത്തിന്​ ചുവപ്പിനെക്കാള്‍ താല്‍പര്യം കാവിയോടാണ്​. ലാവലിന്‍ കേസ് അനന്തമായി നീളുന്നതില്‍ പിണറായി വിജയനും ബി.ജെ.പിയുമായുള്ള ധാരണ വ്യക്തമാണ്.

കര്‍ഷകസമരം, ലഖിംപുര്‍ സംഭവം എന്നിവയെക്കുറിച്ച് അഭിപ്രായം പറയാത്ത ഏക ബി.ജെ.പി ഇതര മുഖ്യമന്ത്രിയാണ് പിണറായി വിജയന്‍. കേരള സി.പി.എമ്മി​െൻറ നിലപാടും നിർദേശവും കേന്ദ്ര നേതൃത്വം അംഗീകരിക്കില്ലെന്നാണ് പ്രതീക്ഷയെന്നും മുരളീധരന്‍ പറഞ്ഞു. ജയില്‍വാസം അനുഭവിക്കേണ്ടിവന്നാലും സില്‍വര്‍ലൈന്‍ പദ്ധതി നടപ്പാക്കാന്‍ അനുവദിക്കില്ല. തന്നിഷ്​ടപ്രകാരം പദ്ധതി അടിച്ചേല്‍പിക്കാന്‍ ശ്രമിച്ചാല്‍ തടയും.

വികസനത്തി​െൻറ പേരില്‍ കൊള്ള നടത്താനുള്ള നീക്കമാണ് ഇപ്പോള്‍ നടക്കുന്നത്. പ്രളയഫണ്ടിന് പണമില്ലാത്ത സര്‍ക്കാര്‍ എവിടെ നിന്നാണ് ഇത്രയും തുക പദ്ധതിക്കായി കണ്ടെത്തുക. ഭാരത്​മാല പദ്ധതിയില്‍ നിലവിലെ ​െറയില്‍വേ ലൈന്‍ വികസിപ്പിച്ച് ഹൈ സ്പീഡ് ട്രെയിന്‍ ആരംഭിക്കുമെന്ന് കേന്ദ്രസര്‍ക്കാറും അറിയിച്ചിട്ടുണ്ട്.

അതു പോരെങ്കില്‍ ചെറിയ വിമാനങ്ങള്‍ വാടകക്കെടുത്ത് യാത്രക്കാരെ കൊണ്ടുപോയാല്‍ പോ​േരയെന്നും മുരളീധരന്‍ ചോദിച്ചു. കെ.പി.സി.സി പുനഃസംഘടനയില്‍ ഇനി പരസ്യപ്രസ്താവനക്കില്ല. സംഘടനാ തെരഞ്ഞെടുപ്പ് നടത്താനുള്ള തീരുമാനം സ്വാഗതാര്‍ഹമാണെന്നും മുരളീധരന്‍ പറഞ്ഞു.