കോവിഡ്​ ടെസ്​റ്റ്​: വി. മുരളീധരൻ മുമ്പ്​ പറഞ്ഞ വാക്കുകൾ വിഴുങ്ങുന്നു - മുഖ്യമന്ത്രി

തിരുവനന്തപുരം: കേന്ദ്ര സഹമന്ത്രി വി. മുരളീധര​​​െൻറ നിലപാടിനെ രൂക്ഷമായി വിമർശിച്ച്​ വീണ്ടും മുഖ്യമന്ത്രി പിണറായി വിജയൻ. മുമ്പ്​ പറഞ്ഞ വാക്കുകൾ വിഴുങ്ങുകയാണ്​ മുരളീധരൻ ചെയ്യുന്നതെന്ന്​ അദ്ദേഹം വാർത്തസമ്മേളനത്തിൽ പറഞ്ഞു. 

കോവിഡ്​ ബാധിച്ചവരെ ഇങ്ങോട്ട്​ പ്രവേശിപ്പിക്കില്ലെന്ന്​ സംസ്​ഥാനം ഒരിടത്തും പറഞ്ഞിട്ടില്ല. വരുന്നവർ പരിശോധന നടത്തണമെന്ന്​ മാത്രമാണ്​ പറഞ്ഞത്​. ഇത്​ പ്രവാസികൾക്കെതിരാണെന്ന പ്രചാരണമാണ്​ നടക്കുന്നത്​. ദൗർഭാഗ്യവശാൽ ആ പ്രചാരകരുടെകൂടെ ഒരു കേന്ദ്ര സഹമന്ത്രിയുമുണ്ട്​. ഇയാൾ മാർച്ച്​ 11ന്​ പറഞ്ഞത്​ ഒാർക്കുന്നത്​ നല്ലതാകും. രോഗമുള്ളവരും ഇല്ലാത്തവരും ഒരേ വിമാനത്തിൽ വന്നാൽ രോഗം പകരാം. അതാത്​ രാജ്യങ്ങളിൽ പരിശോധന നടത്തി രോഗമില്ലാത്തവരെ കൊണ്ടുവരുകയും മറ്റുള്ളവരെ അവിടങ്ങളിൽതന്നെ ചികിത്സിക്കുകയു​മാണ്​ നല്ലതെന്നായിരുന്നു അദ്ദേഹത്തി​​​െൻറ അന്നത്തെ നിലപാട്​. എന്നാൽ, ഇന്ന്​ അതുമാറി. 

രോഗമുള്ളവരെയും നാട്ടിലേക്കെത്തിക്കാൻ തടസ്സമില്ലെന്ന നിലപാടിലാണ്​ കേരളം. എന്നാൽ, രോഗമുള്ളവർ മാത്രമായി വരണം. രോഗം വന്നവരെ അവരുടെ ആരോഗ്യസ്​ഥിതി സമ്മതിച്ചാൽ പ്രത്യേകമായി കൊണ്ടുവന്നാൽ രണ്ട്​ കൈയും നീട്ടി സ്വീകരിച്ച്​ ആവശ്യമായ ചികിത്സ നൽകാൻ കേരളം തയാറാണ്​. 

രോഗമുള്ളവർ അവിടങ്ങളിൽ കഴിയ​െട്ടയെന്ന നിലപാട്​ ഒരിക്കലും സ്വീകരിച്ചിട്ടില്ല. പരിശോധനയില്ലാതെ വരുന്നത് രോഗവ്യാപനം വര്‍ധിപ്പിക്കുമെന്ന് സംസ്ഥാനം ആശങ്കപ്പെട്ടപ്പോൾ കേന്ദ്ര സഹമന്ത്രിയുടെ പ്രതികരണവും എല്ലാവരും കേട്ടതാണ്​. അവിടെ ടെസ്​റ്റ്​ നടത്തിയാണ്​ കൊണ്ടുവരുന്നതെന്നും വിമാനത്തിൽ കയറുന്നതിന്​ മുമ്പ്​ ടെസ്​റ്റ്​ നടത്തുമെന്നുമായിരുന്നു കേന്ദ്രമന്ത്രി അന്ന്​ പ്രതികരിച്ചത്​. ഇത്​ പറഞ്ഞയാളാണ്​ കേരളം ടെസ്​റ്റിനായി പറയുന്നത്​ മഹാപാതകമെന്ന്​ ഇപ്പോൾ പറഞ്ഞുനടക്കുന്നത്​ -മുഖ്യമന്ത്രി പറഞ്ഞു.