തെറ്റു ചെയ്​തിട്ടില്ല; ഒറ്റപ്പെടുത്തൽ സഹിക്കാനാവുന്നില്ല

കണ്ണൂർ: മാതാപിതാക്കളെയും മകളെയും വിഷം നൽകി കൊലപ്പെടുത്തിയ കേസില്‍ റിമാൻഡില്‍ കഴിയുന്ന പിണറായി പടന്നക്കരയിലെ വണ്ണത്താംവീട്ടില്‍ സൗമ്യ (30) കണ്ണൂർ വനിത സബ് ജയിലില്‍ തൂങ്ങിമരിച്ച നിലയിൽ. വെള്ളിയാഴ്​ച രാവിലെ 9.30ഒാടെയാണ് സൗമ്യയെ കശുമാവിൻ കൊമ്പില്‍ തൂങ്ങിയ നിലയില്‍ കണ്ടെത്തിയത്. ജയിൽ ഫാമിലെ പശുക്കളെ പരിചരിക്കുന്ന ​േജാലിയാണ്​ സൗമ്യക്ക്​ നൽകിയിരുന്നത്​. 

പശുവിന്​ പുല്ലരിയാനായി ജയിൽ വളപ്പിൽ പോയപ്പോൾ പശു ഫാമിനു സമീപത്തെ കശുമാവിൽ സാരിയിൽ കെട്ടിത്തൂങ്ങുകയായിരുന്നു. വെള്ളിയാഴ്​ച രാവിലെ ആറിനു സെല്ലിൽനിന്ന്​  പുറത്തിറങ്ങിയശേഷം ഏഴോടെ പശുക്കളെ കറന്ന്​ പാൽ, ജയിൽ അധികൃതരെ ഏൽപിച്ചിരുന്നു. 8.45ന്  തടവുകാർക്കുള്ള ഭക്ഷണവും വാങ്ങിക്കഴിച്ചതായി അധികൃതർ പറഞ്ഞു. അതിനു പിന്നാലെയാണ്​  സംഭവം.

അതേസമയം, ജയിലിൽ പ്രതിയെ നിരീക്ഷിക്കുന്നതിൽ ഗുരുതര വീഴ്​ചയുണ്ടായതായി ആരോപണമുയർന്നിട്ടുണ്ട്​. സഹതടവുകാർ കണ്ടെത്തിയ വിവരമറിയിച്ച ഉടൻ ജയിൽ ജീവനക്കാർ കണ്ണൂർ ജില്ല ആശുപത്രിയിൽ എത്തിച്ചെങ്കിലും  രക്ഷിക്കാനായില്ല. സൗമ്യയുടെ ആത്മഹത്യാകുറിപ്പും ജയിലിൽ നിന്ന്​ പൊലീസ് കണ്ടെത്തി. തെറ്റു ചെയ്തിട്ടില്ലെന്നും വല്ലാത്ത  ഒറ്റപ്പെടൽ അനുഭവിക്കുന്നതായും കത്തിൽ സൗമ്യ പറയുന്നു. സമൂഹത്തി​​​​​െൻറ കുറ്റപ്പെടുത്തലും ബന്ധുക്കളുടെ  ഒറ്റപ്പെടുത്തലും മൂലം പിടിച്ചുനിൽക്കാൻ കഴിയുന്നില്ലെന്നും കത്തിലുണ്ട്​.

സൗമ്യയുടെ മാതാപിതാക്കളായ പിണറായി പടന്നക്കര വണ്ണത്താംവീട്ടില്‍ കുഞ്ഞിക്കണ്ണന്‍ (80), ഭാര്യ കമല (65),  സൗമ്യയുടെ മകള്‍ ഐശ്വര്യ (ഒമ്പത്) എന്നിവരെ വിഷം നൽകി കൊലപ്പെടുത്തിയതിന്​  കഴിഞ്ഞ ഏപ്രിലിലാണ്​ സൗമ്യ അറസ്​റ്റിലായത്​. ഛർദിയും വയറിളക്കവും ബാധിച്ചായിരുന്നു മൂന്നുപേരുടെയും മരണം. ഒരേ വീട്ടിൽ ഒരേ കാരണത്താൽ നാലു മാസത്തിനിടെ  മൂന്നുപേർ ദുരൂഹസാഹചര്യത്തില്‍ മരിച്ചതിനെ തുടർന്ന്​ നാട്ടുകാർ ഉന്നയിച്ച സംശയമാണ്​ ​െകാലപാതകത്തി​​​​​െൻറ ചുരുളഴിച്ചത്​. 

മരിച്ചവരുടെ ശരീരത്തില്‍ എലിവിഷത്തി​​​​​െൻറ അംശം കണ്ടെത്തിയതോടെ സൗമ്യയെ പൊലീസ്​ ചോദ്യം​ ചെയ്​തു. സൗമ്യ കുറ്റസമ്മതം നടത്തുകയും ചെയ്​തു. വിവാഹമോചിതയായ സൗമ്യക്ക്​ പലരുമായും അടുപ്പമുണ്ടായിരുന്നു.  അവിഹിത ബന്ധങ്ങൾക്കു സൗകര്യമൊരുക്കുന്നതിനായാണ്​ സൗമ്യ കൊലപാതകങ്ങൾ നടത്തിയതെന്നാണ്​ കുറ്റപത്രം.