പ്രമുഖ അഭിഭാഷകൻ പി.ജി. തമ്പി അന്തരിച്ചു

ആലപ്പുഴ/ കൊച്ചി: പ്രമുഖ അഭിഭാഷകനും മുൻ ഡയറക്​ടർ ജനറൽ ഒാഫ്​ പ്രോസിക്യൂഷനുമായ ആലപ്പുഴ സനാതനം വാർഡിൽ രാജശിൽപിയിൽ പി.ജി. തമ്പി ( പി. ഗോപാലകൃഷ്​ണൻ തമ്പി-79)  അന്തരിച്ചു. ഒ​േട്ടറെ പ്രമാദമായ ക്രിമിനൽ കേസുകളിൽ അഭിഭാഷകനായിരുന്നു. ഹരിപ്പാട്​  മണ്ഡലത്തിൽനിന്ന്​ നിയമസഭയിലേക്ക്​ മത്സരിച്ചിട്ടുണ്ട്​. ഹരിപ്പാട്​ കളരിക്കൽ പരേതരായ പി. കൃഷ്ണപിള്ളയ​ുടെയും ഭവാനിക്കുട്ടി തങ്കച്ചിയുടെയും മകനാണ്​. ഭാര്യ പരേതയായ സുമിത്ര തമ്പി. മക്കൾ: ഹരികൃഷ‌്ണൻതമ്പി (ബംഗളൂരു), അഡ്വ. പ്രിയദർശൻ തമ്പി, ഡോ. മഹേഷ‌് തമ്പി (സുചിത്ര ആശുപത്രി, എറണാകുളം). മരുമക്കൾ: പ്രിയ, പാർവതി, സിത്താര. പ്രശസ്ത ഗാനരചയിതാവ് ശ്രീകുമാരൻ തമ്പി,  പ്രസന്നവദനൻ തമ്പി, തുളസിഭായി, പരേതനായ നോവലിസ്​റ്റ്​  പി.വി. തമ്പി എന്നിവർ സഹോദരങ്ങളാണ്.

സംസ്​കാരം. ചൊവ്വാഴ്​ച ഉച്ചക്ക്​ ഒന്നിന്​ ആലപ്പുഴ ചാത്തനാട്​ ശ്​മശാനത്തിൽ. ബാര്‍ കൗണ്‍സില്‍ ചെയര്‍മാന്‍, ബാര്‍ ഫെഡറേഷന്‍ പ്രസിഡൻറ്​, ആലപ്പുഴ ബാർ അസോസിയേഷൻ പ്രസിഡൻറ്​, ലോയേഴ്സ് യൂനിയന്‍ സംസ്ഥാന വൈസ് പ്രസിഡൻറ്​ തുടങ്ങിയ നിലകളില്‍ പ്രവര്‍ത്തിച്ചിട്ടുണ്ട്. ആലപ്പുഴ എസ്.ഡി. കോളജിൽനിന്നും ഇംഗ്ലീഷ് സാഹിത്യത്തിൽ എം.എ. ബിരുദവും തിരുവനന്തപുരം ഗവൺമ​​െൻറ്​ ലോ കോളജിൽ നിന്നും ബി.എൽ. ബിരുദവും നേടി. എസ്.ഡി യൂനിയൻ ചെയർമാൻ, ഗവൺമ​​െൻറ്​ ലോ കോളജ്, തിരുവനന്തപുരം യൂനിയൻ ജനറൽ സെക്രട്ടറി, നാഷനൽ സ്​റ്റുഡൻറ്​സ് യൂനിയൻ സംസ്ഥാന പ്രസിഡൻറ്​, സ്വതന്ത്ര വിദ്യാർഥി സംഘടന സംസ്ഥാന സെക്രട്ടറി തുടങ്ങിയ പദവികൾ വഹിച്ചു. 
സർപ്പപത്രം, സാലഭഞ്ജിക, സംക്രമണം, സമാഗമം, സ്വർണക്കച്ചവടം, സന്നിവേശം,സ്വപ്നസഞ്ചാരിണി എന്നിവയാണ് സാഹിത്യ കൃതികൾ.