പെട്ടിമുടി ദുരന്തത്തിൽ കാണാതായ ഒരു മൃതദേഹംകൂടി കണ്ടെത്തി

മൂന്നാർ: പെട്ടിമുടി ദുരന്തത്തിൽ കാണാതായ ഒരുസത്രീയുടെ മൃതദേഹംകൂടി കണ്ടെത്തി. കാണാതായവരുടെ ബന്ധുക്കളും തോട്ടം തൊഴിലാളികളും ചേർന്ന് നടത്തിയ തിരച്ചിലിലാണ് ഭൂതക്കുഴിക്കുസമീപം പുഴയിൽ ഞായറാഴ്ച വൈകീട്ട്​ നാ​േലാടെ മൃതദേഹം കണ്ടെത്തിയത്. ഇതോടെ പെട്ടിമുടി ദുരന്തത്തിൽ മരിച്ചവരുടെ എണ്ണം 66 ആയി.

മൃതദേഹം കണ്ടെത്തിയ വിവരം നാട്ടുകാർ അറിയിച്ചതിനെത്തുടർന്ന് മൂന്നാറിൽനിന്ന്​ അഗ്​നിരക്ഷാസേനയും പൊലീസും സ്ഥലത്തേക്ക് തിരിച്ചതായി മൂന്നാർ ഡി.എഫ്​.ഒ എം.വി.ജി. കണ്ണൻ 'മാധ്യമ'ത്തോട്​ പറഞ്ഞു. പാറയിടുക്കില്‍ അകപ്പെട്ട നിലയി​െല മൃതദേഹം വീണ്ടെടുക്കാനുള്ള നടപടി തിങ്കളാഴ്​ച നടത്തും.

തിരച്ചിൽ കഴിഞ്ഞ ചൊവ്വാഴ്ച ജില്ല ഭരണകൂടം താൽക്കാലികമായി നിർത്തിവെച്ചിരുന്നു. എങ്കിലും കാണാതായവരുടെ ബന്ധുക്കളും രാജമലയിലെ തൊഴിലാളികളുമടക്കം 20 അംഗ സംഘം പെട്ടിമുടി പുഴയിലെ ഭൂതക്കുഴി ഭാഗത്ത് തിരച്ചിൽ തുടരുകയായിരുന്നു.

പെട്ടിമുടി പുനരധിവാസം; മന്ത്രിയും കമ്പനി അധികൃതരും ചർച്ച നടത്തി

മൂന്നാര്‍: പെട്ടിമുടി ദുരന്തത്തി​െൻറ പശ്ചാത്തലത്തിൽ തൊഴിലാളികളുടെ പുനരധിവാസം സംബന്ധിച്ച്​ മന്ത്രി എം.എം. മണിയും കണ്ണന്‍ ദേവന്‍ കമ്പനി അധികൃതരും ചർച്ച നടത്തി. ഞായറാഴ്ച രാവിലെ മൂന്നാര്‍ ​െഗസ്​റ്റ്​ ഹൗസില്‍ കമ്പനി എം.ഡി മാത്യു എബ്രഹാമുമായാണ്​ മന്ത്രി ചർച്ച നടത്തിയത്​. ദുരന്തത്തിനുശേഷം പെട്ടിമുടിയിലെ 67 കുടുംബങ്ങള്‍ വിവിധ എസ്​​റ്റേറ്റുകളിലെ ബന്ധുക്കളുടെ വീടുകളിലാണ് അഭയം തേടിയിരിക്കുന്നത്. തൊഴിലാളികള്‍ക്ക് വീടുവെച്ചുനല്‍കുന്നതിന് കമ്പനി പൂര്‍ണ പിന്തുണ അറിയിച്ചതായും ചര്‍ച്ചയുടെ വിശദാംശങ്ങള്‍ സര്‍ക്കാറിനെ അറിയിക്കുമെന്നും മന്ത്രി പറഞ്ഞു.