പൊലീസിന്​ നേരെ പെട്രോൾ ബോംബേറ്​; ഒരാളെ നാട്ടുകാർ പിടികൂടിയത്​ സാഹസികമായി

കൊട്ടാരക്കര: പെട്രോൾ പമ്പിലെ ജീവനക്കാ​രിയെ ആക്രമിച്ച കേസിൽ പ്രതികളെ തേടിയെത്തിയ ​പൊലീസ്​ സംഘത്തിന്​ നേരെ പെട്രോൾ ബോംബ്​ എറിഞ്ഞ്​ ആക്രമണം. പ്രതികളിലൊരാളെ പൊലീസ്​ തന്നെ സാഹസികമായി പിടികൂടിയപ്പോൾ സ്ഥലത്തു നിന്ന്​ രക്ഷപ്പെട്ട രണ്ടാമനെ നാട്ടുകാർ പിന്തുടർന്ന്​ അതിസാഹസികമായി പിടികൂടി. പൂയപ്പള്ളി പൊലീസിന്​ നേരെയാണ്​ ആക്രമണമുണ്ടായത്​. പുനലൂർ ഷാജി സദനത്തിൽ റിജോമോനെയാണ് (23) പൊലീസ് സ്ഥലത്തുനിന്ന്​ പിടികൂടിയത്​. ചാത്തന്നൂർ മീനാട് താഴം സുറുമി മൻസിലിൽ ഷാജഹാനെയാണ് (26) നാട്ടുകാർ സാഹസികമായി പിടികൂടി പൂയപ്പള്ളി പൊലീസിൽ ഏൽപ്പിച്ചത്.

തിങ്കളാഴ്ച വൈകീട്ട് നാലോടെയാണ്​ സംഭവങ്ങൾക്ക്​ തുടക്കം. കൊട്ടാരക്കര ചന്തമുക്കിന് സമീപത്തെ പെട്രോൾ പമ്പിൽ കാറിൽ പെട്രോൾ നിറച്ച രണ്ടു യുവാക്കൾ പണമിടപാടുമായി ബന്ധപ്പെട്ട വാക്കേറ്റത്തിനിടെ​ ജീവനക്കാരിയുടെ മുഖത്തടിച്ചു. ഉടൻ ഇവർ കാറിൽ കയറി രക്ഷപ്പെട്ടു. ജീവനക്കാരി വിവരം കൊട്ടാരക്കര പൊലീസിനെ അറിയിച്ചു. പ്രതികൾക്കുവേണ്ടി തിരച്ചിൽ ആരംഭിച്ച പൊലീസ്​ സി.സി ടി.വി ദൃശ്യം വഴി കാർ നമ്പർ ക​ണ്ടെത്തി ഉടമയെ മനസ്സിലാക്കി. പുത്തൂർ കരിമ്പുഴയിലുള്ള കാർ ഉടമ ഗൾഫിലാണെന്ന് അന്വേഷണത്തിൽ വ്യക്തമായി. ഉടമയുടെ അനിയൻ കാർ വാടകക്ക് കൊടുത്തിരുന്നു. മൂന്നുപേരുടെ കൈമറിഞ്ഞാണ്​ പ്രതികൾക്ക്​ കാർ ലഭിച്ചത്. ഈ മൂന്നു പേരെയും ചോദ്യം ചെയ്താണ്​ പ്രതികളുടെ നമ്പർ മനസ്സിലാക്കി ഇവരിലേക്ക്​ എത്തിയത്​.

പൂയപ്പള്ളി മേഖലയിലേക്ക്​ പ്രതികൾ വരുന്ന വിവരം കൊട്ടാരക്കര പൊലീസ്​ അറിയിച്ചതോടെ രാത്രി 12ഓടെ ഓടനാവട്ടം പരുത്തിയറയിൽ വെച്ച് പൂയപ്പള്ളി പൊലീസ്​ സാഹസികമായി കാർ തടഞ്ഞു. കാറിൽനിന്ന്​ ഷാജഹാൻ പെട്രോൾ ബോംബുമായി പുറത്തിറങ്ങി പൊലീസിന്‍റെ നേരെ എറിഞ്ഞ ശേഷം ഓടി രക്ഷപ്പെട്ടു. പരിക്കേൽക്കാതെ പൊലീസുകാർ അത്ഭുതകരമായി രക്ഷപ്പെട്ടു. കാർ ഓടിച്ചിരുന്ന റിജോമോനെ പൊലീസ്​ സാഹസികമായി പിടികൂടി. കസ്​റ്റഡിയിൽ എടുത്തകാറിൽനിന്ന്​ രണ്ട്​ പെട്രോൾ ബോംബും അതുണ്ടാക്കാൻ ഉപയോഗിക്കുന്ന സാമഗ്രികളും ലഭിച്ചു.

ഷാജഹാൻ പരുത്തിയറയിലെ കനാൽ ഭാഗത്ത് രാത്രി മുഴുവൻ ഒളിച്ചിരുന്നു. പൊലീസുകാർക്കൊപ്പം നാട്ടുകാരും അന്വേഷണം ആരംഭിച്ചെങ്കിലും രാത്രിയിൽ കണ്ടെത്താനായില്ല. ചൊവ്വാഴ്ച രാവിലെ 6.30ഓടെ പ്രദേശത്ത്​ ട്യൂഷന് പോകാൻ വന്ന കുട്ടിയോട് ബസ്​ കൂലി ഷാജഹാൻ ആവശ്യപ്പെട്ടു. കാശില്ലെന്ന്​ പറഞ്ഞ കുട്ടിയെ പെട്രോൾ ബോംബ് എറിയുമെന്ന് ഭീഷണിപ്പെടുത്തി. കുട്ടി കാശ് നൽകിയതിനു​ പിന്നാലെ നാട്ടുകാരോട് വിവരം പറഞ്ഞു. തുടർന്ന് നാട്ടുകാർ ബസ്​ പിന്തുടർന്ന് മീയണ്ണൂർ ഭാഗത്ത് വെച്ച് തടഞ്ഞ് പ്രതിയെ പിടികൂടി പൊലീസിൽ ഏൽപ്പിക്കുകയായിരുന്നു.

റിജോമോനെ കൊട്ടാരക്കര പൊലീസ്​ സ്റ്റേഷനിലും ഷാജഹാനെ പൂയപ്പള്ളി സ്റ്റേഷനിലും എത്തിച്ചു. ഇരുവർക്കും രണ്ട് പൊലീസ്​ സ്റ്റേഷനുകളിൽ കഞ്ചാവ്, മോഷണം എന്നീ കേസുകൾ നിലവിൽ ഉണ്ട്. വിരലടയാള വിദഗ്​ധർ തെളിവ്​ ശേഖരിച്ചു. രണ്ടു പേർക്കും എതിരെ എക്സ്​പ്ലോസിവ് ആക്ട് പ്രകാരവും വധശ്രമത്തിനും പൊലീസിന്‍റെ ഡ്യൂട്ടി തടസ്സപ്പെടുത്തിയതിനുമെതിരെ കേസെടുത്തു. പെട്രോൾ ബോംബ് സംബന്ധിച്ചും വിശദ അന്വേഷണം നടത്തും.