ഗ്രേസ്​ മാർക്ക്​ ഒഴിവാക്കുന്നതിനെതിരെ ഹൈകോടതിയിൽ ഹരജി

കൊച്ചി: ഇത്തവണ എസ്.എസ്.എൽ.സി, പ്ലസ് ടു പരീക്ഷകളിൽ ഗ്രേസ് മാർക്ക് നൽകേണ്ടെന്ന പൊതുവിദ്യാഭ്യാസ വകുപ്പ്​ നിർദേശത്തിനെതിരെ ഹൈകോടതിയിൽ ഹരജി. എൻ.സി.സി, സ്കൗട്ട്, സ്​റ്റുഡൻറ്​​ പൊലീസ് കാഡറ്റ്, നാഷനൽ സർവിസ് സ്‌കീം തുടങ്ങിയവയിൽ പ്രവർത്തിച്ചിരുന്ന വിദ്യാർഥികൾക്ക് ഗ്രേസ് മാർക്ക് നിഷേധിക്കുന്നതിനെതിരെ കോഴിക്കോട് മുക്കം സ്വദേശിയായ 10ാം ക്ലാസ് വിദ്യാർഥി ഫസീഹ് റഹ്​മാനാണ് ഹരജി നൽകിയത്​. സ്കൗട്ട് ആൻഡ് ഗൈഡ്സ് വിഭാഗത്തിൽ 2021ലെ രാജ്യ പുരസ്കാർ നേടിയ 115 വിദ്യാർഥികളിലൊരാളാണ് ഹരജിക്കാരൻ.

കോവിഡ് സാഹചര്യത്തിൽ സ്കൂളുകൾ പൂട്ടിയിട്ടിരിക്കുന്നതിനാൽ എൻ.സി.സി, സ്കൗട്ട് തുടങ്ങിയ പാഠ്യേതര പ്രവർത്തനങ്ങളൊന്നും നടന്നിട്ടില്ലെന്ന് കാട്ടിയാണ് പൊതുവിദ്യാഭ്യാസ വകുപ്പ്​ ഇത്തരമൊരു നിർദേശം നൽകിയതെന്ന് ഹരജിയിൽ പറയുന്നു. എന്നാൽ, ഈ നിഗമനം അടിസ്ഥാനരഹിതമാണ്​. കോവിഡ് വ്യാപനം നിയന്ത്രിക്കാൻ അധികൃതരുമായി ചേർന്ന് ഇൗ വിഭാഗങ്ങൾ പ്രവർത്തിച്ചിരുന്നു. സ്കൂളുകൾ പ്രവർത്തിച്ചിരുന്നില്ലെന്ന കാരണത്താൽ ഗ്രേസ് മാർക്ക് നിഷേധിക്കരുത്​.

പുനഃപരിശോധിക്കണമെന്ന്​ ആവശ്യപ്പെട്ട് ജൂലൈ ഒന്നിന് ഹരജിക്കാരൻ നിവേദനം നൽകിയെങ്കിലും നടപടിയുണ്ടായില്ല. നിവേദനം പരിഗണിക്കാൻ നിർദേശിക്കണമെന്നും ഗ്രേസ് മാർക്കി​െൻറ കാര്യത്തിൽ തീരുമാനമെടുക്കുന്നതുവരെ എസ്.എസ്.എൽ.സി പരീക്ഷാഫല പ്രഖ്യാപനം തടയണമെന്നും ഹരജിയിൽ ആവശ്യപ്പെടുന്നു.