ഉമ തോമസിന്റെ നാമനിർദേശ പത്രിക തള്ളണമെന്ന്​ ഹൈകോടതിയിൽ ഹരജി

കൊച്ചി: തൃക്കാക്കര ഉപതെരഞ്ഞെടുപ്പിലെ യു.ഡി.എഫ് സ്ഥാനാർഥി ഉമ തോമസിന്റെ നാമ നിർദേശ പത്രിക തള്ളണമെന്നാവശ്യപ്പെട്ട് ഹൈകോടതിയിൽ ഹരജി. ഉമ തോമസിന്റെ ഭർത്താവായ മുൻ എം.എൽ.എ അന്തരിച്ച പി.ടി. തോമസിന് എച്ച്.ഡി.എഫ്.സി, എസ്.ബി.ഐ ബാങ്കുകളിൽ വായ്പാ കുടിശ്ശികയുള്ളതും കൊച്ചി നഗരസഭയിലെ ഭൂമിക്ക്​ നികുതി കുടിശ്ശികയുള്ളതും മറച്ചുവെച്ചാണ്​ പത്രിക നൽകിയതെന്ന്​ ചൂണ്ടിക്കാട്ടി സ്വതന്ത്ര സ്ഥാനാർഥിയായ കടവന്ത്ര സ്വദേശി സി.പി. ദിലീപ് നായരാണ്​ ഹരജി നൽകിയിരിക്കുന്നത്​. തിങ്കളാഴ്‌ച ജസ്റ്റിസ് എൻ. നഗരേഷ്​ ഹരജി പരിഗണിക്കും.

ഇക്കാര്യങ്ങൾ ചൂണ്ടിക്കാട്ടി റിട്ടേണിങ്​ ഓഫിസർക്ക് മേയ് 12ന് പരാതി നൽകിയെങ്കിലും നിരസിച്ചതായി ഹരജിയിൽ പറയുന്നു. തുടർന്നാണ്​ ഉമ തോമസിന്റെ നാമനിർദേശ പത്രിക സ്വീകരിച്ചത്​. ഭർത്താവിന്റെ പേരിലുള്ള ആസ്തി ബാധ്യതകൾ അദ്ദേഹം മരിച്ചാൽ ഭാര്യക്കാണ് വന്നുചേരുകയെന്ന സുപ്രീം കോടതി വിധിയുണ്ട്​. ഇതു പ്രകാരം പി.ടി. തോമസിന്റെ വായ്പ, ഭൂനികുതി കുടിശ്ശിക ബാധ്യതകൾ ഭാര്യയായ ഉമ തോമസിനാണ്​.

മാത്രമല്ല, ബാലറ്റ് പേപ്പറിൽ അക്ഷരമാലാക്രമം മറികടന്ന് ഉമയുടെ പേരിന് മുൻഗണന നൽകിയെന്നും തെരഞ്ഞെടുപ്പ്​ നിരീക്ഷകൻ ഇതിലിടപെട്ടില്ലെന്നും ഹരജിയിൽ ആരോപിക്കുന്നു.