നഴ്സുമാരുടെ സമരത്തിനെതിരെ ഹൈകോടതിയിൽ ഹരജി

കൊച്ചി: സ്വകാര്യ ആശുപത്രിയിലെ നഴ്സുമാർ വ്യാഴാഴ്ച നടത്താൻ നിശ്ചയിച്ച സമരം തടയണമെന്നാവശ്യപ്പെട്ട് ഹൈകോടതിയിൽ ഹരജി. യുനൈറ്റഡ് നഴ്സസ് അസോസിയേഷ​​​െൻറ നേതൃത്വത്തിൽ നടക്കാനിരിക്കുന്ന സമരത്തിനെതിരെ തിരുവനന്തപുരം ആക്കുളം കേന്ദ്രമായി പ്രവർത്തിക്കുന്ന ഫോറം ഫോർ സോഷ്യൽ ജസ്​റ്റിസ് എന്ന സംഘടനയാണ് ഹരജി നൽകിയിരിക്കുന്നത്. ബദൽ സംവിധാനം ഏർപ്പെടുത്താതെ നഴ്സുമാർ നടത്തുന്ന സമരം സംസ്ഥാനത്തെ ആരോഗ്യമേഖലയെ പ്രതികൂലമായി ബാധിക്കുമെന്ന് ഹരജിയിൽ പറയുന്നു.

സമരം തടഞ്ഞില്ലെങ്കിൽ പൊതുജനങ്ങളുടെ ജീവനെ ബാധിക്കും. ഇൗ മാസം 12ന് ചേർത്തലയിൽ നഴ്സുമാർ സമരത്തി​​​െൻറ ഭാഗമായി ദേശീയപാത ഉപരോധിച്ചു. ഇത്​ നിയമവിരുദ്ധമാണ്. പൊതുജനങ്ങളുടെ താൽപര്യത്തിന്​ വിരുദ്ധമായ സമരത്തെ നിയമവിരുദ്ധമായി പ്രഖ്യാപിക്കണം. കേരള അവശ്യ സർവിസ് നിയമം (കെസ്മ) പ്രകാരം സമരം നിരോധിക്കാൻ സർക്കാറിന് നിർദേശം നൽകണം തുടങ്ങിയവയാണ് ഹരജിയിലെ ആവശ്യങ്ങൾ.