മലപ്പുറത്ത്​ മതിയായ വാക്​സിൻ അനുവദിക്കണമെന്ന ആവശ്യവുമായി വീണ്ടും ഹരജി

കൊച്ചി: സംസ്ഥാനത്ത്​ ഏറ്റവുമധികം ജനസംഖ്യയുള്ള മലപ്പുറത്ത്​ മതിയായ കോവിഡ്​ വാക്​സിൻ അനുവദിക്കണമെന്നാവശ്യപ്പെട്ട്​ വീണ്ടും ഹരജി. കോവിഡ്​ പ്രതിരോധ പ്രവർത്തനങ്ങളിൽ മലപ്പുറം ജില്ലയോടുള്ള അവഗണന അവസാനിപ്പിക്കണമെന്നതടക്കം ആവശ്യപ്പെട്ട്​ വെൽഫെയർ പാർട്ടി ജില്ല സെക്രട്ടറി വി. ഗണേശാണ്​ ഹരജി നൽകിയിരിക്കുന്നത്​.

ജനസംഖ്യാടിസ്ഥാനത്തിലാണ് സംസ്ഥാനങ്ങൾക്ക് കേന്ദ്ര സർക്കാർ വാക്‌സിൻ വിതരണം ചെയ്യുന്നതെങ്കിലും സംസ്ഥാന സർക്കാർ ഇൗ മാനദണ്ഡം പാലിക്കുന്നില്ലെന്ന് ഹരജിയിൽ പറയുന്നു. 16 ശതമാനം പേർക്ക്​ മാത്രമാണ്​ മലപ്പുറം ജില്ലയിൽ വാക്സിൻ ലഭിച്ചത്. ജനസംഖ്യയിൽ രണ്ടാം സ്ഥാനത്തുള്ള തിരുവനന്തപുരത്ത് 30 ശതമാനം പേർക്ക് നൽകിക്കഴിഞ്ഞു.

കോവിഡ് രണ്ടാംതരംഗത്തിൽ മലപ്പുറം ദുരന്ത ഭൂമിയാകാതിരിക്കാൻ മതിയായ വാക്സിൻ വിതരണം ഉറപ്പാക്കണമെന്നും ആരോഗ്യരക്ഷാ സൗകര്യങ്ങൾ ഒരുക്കാൻ സർക്കാറിന്​ നിർദേശം നൽകണമെന്നുമാണ്​​ ഹരജിയിലെ ആവശ്യം. സമാന ആവശ്യമുന്നയിച്ച് എസ്.ഡി.പി.ഐ നൽകിയ ഹരജിയും കോടതിയുടെ പരിഗണനയിലുണ്ട്​.