കരിപ്പൂർ ​റെസ നീളംകൂട്ടൽ: ഭൂമി ഏറ്റെടുക്കുന്നതിന്​ അനുമതി

കരിപ്പൂർ: കോഴിക്കോട്​ വിമാനത്താവളത്തിന്‍റെ റൺവേ എൻഡ്​ സേഫ്​റ്റി ഏരിയ (റെസ) നീളംകൂട്ടുന്നതിന്​ 14.5 ഏക്കർ ഭൂമി ഏറ്റെടുക്കുന്നതിന്​ റവന്യൂ വകുപ്പിന്‍റെ അനുമതി. ഭൂമി ഏറ്റെടുത്ത്​ നൽകുന്നതിന്​ കഴിഞ്ഞ ദിവസം ഗതാഗത വകുപ്പിന്‍റെ ഭരണാനുമതി ലഭിച്ചിരുന്നു. ഇതിന്‍റെ തുടർച്ചയായാണ്​ റവന്യൂ വകുപ്പും അനുമതി നൽകിയിരിക്കുന്നത്​. 2013ലെ ഭൂമി ഏറ്റെടുക്കൽ നിയമപ്രകാരം മലപ്പുറം കലക്ടർക്കാണ്​ ഭൂമി ഏറ്റെടുക്കൽ ചുമതല.

പടിഞ്ഞാറു വശത്ത്​ പള്ളിക്കൽ വില്ലേജിൽനിന്ന്​ ഏഴ്​ ഏക്കറും കിഴക്കു​ വശത്ത്​ നെടിയിരുപ്പ്​ വില്ലേജിൽനിന്ന്​ ഏഴര ഏക്കറുമാണ്​ ഏറ്റെടുത്ത്​ നൽകേണ്ടത്​. പള്ളിക്കലിൽ ബ്ലോക്ക്​ നമ്പർ 11ൽ റീസർവേ നമ്പർ 170, 177, 178, നെടിയിരുപ്പിൽ ബ്ലോക്ക്​ നമ്പർ 36ൽ റീസർവേ നമ്പർ 63, 64, 65, 67, 68, 69, 70, 71 എന്നീ ഭൂമിയാണ്​ ഏറ്റെടുക്കേണ്ടത്​. വിഷയത്തിൽ ചീഫ്​ സെക്രട്ടറിയുടെ അധ്യക്ഷതയിൽ യോഗം ചേരുകയും നടപടികൾ വേഗത്തിലാക്കാൻ തീരുമാനിക്കുകയും ചെയ്തിരുന്നു. സംസ്ഥാന സർക്കാർ ഭൂമി ഏറ്റെടുത്ത്​ റൺവേക്ക്​ സമാനമായി നിരപ്പാക്കി നൽകും. ഇതിന്‍റെ ചെലവ്​ വിമാനത്താവള അതോറിറ്റി നൽകണം.

റവന്യൂ വകുപ്പ്​ അനുമതികൂടി ലഭിച്ചതോടെ തുടർനടപടികൾ വേഗത്തിലാകും. ഇനി​ സർവേ അതിരടയാള നിയമപ്രകാരം ഭൂമി അളക്കുന്നതിനായി വിജ്​ഞാപനം ഇറക്കണം. സർവേ നടത്തി ഭൂമി ഏറ്റെടുത്തു നൽകുന്നതിനായി 50 ലക്ഷം രൂപ റവന്യൂ വകുപ്പിന്​ സർക്കാർ അനുവദിച്ചിട്ടുണ്ട്​.

2013ലെ ഭൂമി ഏറ്റെടുക്കൽ നിയമപ്രകാരം പരിസ്ഥിതി ആഘാത പഠനം നടത്തണം. സ്വകാര്യ ഏജൻസി തയാറാക്കി നൽകുന്ന റിപ്പോർട്ടിന്‍റെ അടിസ്ഥാനത്തിലായിരിക്കും സർവേ നടത്തുന്നതിനും തുടർ നടപടികൾക്കും സർക്കാർ ഉത്തരവ്​ ഇറക്കുക. അടുത്ത മാർച്ചിനകം ഭൂമി കൈമാറണമെന്നാണ്​ അതോറിറ്റി ആവശ്യപ്പെട്ടിരിക്കുന്നത്​. റെസ നീളംകൂട്ടുന്നതിനൊപ്പം റൺവേ റീകാർപ്പറ്റിങ്​, സെന്‍റർ ലൈൻ ലൈറ്റിങ്​ സംവിധാനം ഒരുക്കൽ തുടങ്ങിയ നടപടികളും പൂർത്തിയാക്കും. 2023 ഡിസംബറിനകം പ്രവൃത്തി പൂർത്തിയാക്കണമെന്നാണ്​ വ്യോമയാനമന്ത്രാലയം നിയോഗിച്ച സമിതി നിർദേശിച്ചിട്ടുള്ളത്​.