കാരുണ്യത്തി​െൻറ പച്ചപ്പിൽ പീപ്ൾസ് വില്ലേജിൽ ആഹ്ലാദം ചിറകടിച്ചു; 25 കുടുംബങ്ങൾക്ക്​ സ്​നേഹവീടുകൾ കൈമാറി

പനമരം (വയനാട്​): പനമരം കരിമ്പുമ്മൽ നീരട്ടാടിയിൽ പീപ്ൾസ് ഫൗണ്ടേഷൻ നിർമിച്ച പീപ്ൾസ് വില്ലേജ്  ഗുണഭോക്താക്കളായ കുടുംബങ്ങൾക്ക്​ കൈമാറി. 2018ലെ പ്രളയ പുനരധിവാസ പദ്ധതി പൂർത്തീകരിച്ചതി​​െൻറ പ്രഖ്യാപനവും ഇതോടൊപ്പം നടന്നു. പ്രളയത്തിൽ എല്ലാം നഷ്​ടപ്പെട്ട്​ ജീവിതം വഴിമുട്ടി നിന്ന  25 കുടുംബങ്ങളാണ് ശനിയാഴ്ച അതിജീവനത്തി​െൻറ സ്​നേഹവീടുകളിൽ കാലെടുത്തുവെച്ചത്​.  പ്രീ സ്കൂൾ, പ്രാഥമികാരോഗ്യ കേന്ദ്രം, കളിസ്ഥലം എന്നിവ ഉൾക്കൊള്ളുന്നതാണ് കാരുണ്യത്തി​​െൻറ പച്ചപ്പിൽ ഉയർന്ന പീപ്ൾസ് വില്ലേജ്.  

വയനാടൻ മലനിരകളുടെ മടിത്തട്ടിൽ മനോഹര കാഴ്ചകൾക്ക് നടുവിലെ സ്​നേഹഗ്രാമത്തിൽ  ലോക്ഡൗൺ മാനദണ്ഡങ്ങൾ പാലിച്ചായിരുന്നു ഉദ്​ഘാടന ചടങ്ങ്​​. 2018 പ്രളയ പുനരധിവാസ പദ്ധതി പൂർത്തീകരണ പ്രഖ്യാപനം  ജമാഅത്തെ ഇസ്​ലാമി ഹിന്ദ്​ അമീർ സയ്യിദ്​ സആദത്തുല്ല ഹുസൈനി വിഡിയോ കോൺഫറൻസിലൂടെ നിർവഹിച്ചു. പദ്ധതിയിൽ പങ്കാളിത്തം വഹിച്ചവരെയും ഗുണഭോക്താക്കളെയും അഭിനന്ദിച്ച അദ്ദേഹം പ്രളയം സൃഷ്​ടിച്ച  ദുരന്തങ്ങൾക്ക്​ പിന്നാലെ വന്ന കോവിഡ്​ മഹാമാരിയുടെ പ്രതിസന്ധി അതിജീവിക്കാൻ സമർപ്പണബോധത്തോടെ വിപുല പദ്ധതികൾ വേണ്ടിവരുമെന്ന്​ വ്യക്തമാക്കി. രാജ്യത്തിനുത​െന്ന മാതൃകയാണ്​ പീപ്ൾസ് ഫൗണ്ടേഷ​​െൻറ പ്രവർത്തനങ്ങൾ -അദ്ദേഹം പറഞ്ഞു. 

പീപ്ൾസ് വില്ലേജ്​ ഉദ്​ഘാടനം  ജമാഅത്തെ ഇസ്​ലാമി ഹിന്ദ്​ സെക്രട്ടറി ജനറൽ ടി. ആരിഫലി നിർവഹിച്ചു. അതിജീവനത്തി​​െൻറയും പുനരധിവാസത്തി​​െൻറയും മാതൃകയാണിത്​. കുടുംബങ്ങൾ വീടിനകത്തും പുറത്തും പരസ്​രം സഹകരിച്ചും സ്​നേഹിച്ചും കാരുണ്യത്തോടെ ജീവിക്കണമെന്നും അതു സമൂഹത്തിൽ വെളിച്ചം പരത്തുമെന്നും അദ്ദേഹം പറഞ്ഞു.  
 ജമാഅത്തെ ഇസ്​ലാമി കേരള അമീർ  എം.ഐ. അബ്​ദുൽ അസീസ്​ അധ്യക്ഷതവഹിച്ചു. പ്രളയകാലത്ത്​ കേരള ജനതക്ക്​ നൽകിയ വാക്ക്​ പൂർത്തീകരിക്കുകയാണെന്നും സുമനസ്സുകൾ സമർപ്പിച്ച പ്രതീക്ഷകൾ നിഷ്​ഫലമായി പോയിട്ടില്ലെന്നും ​അദ്ദേഹം ചൂണ്ടിക്കാട്ടി.  

വയനാട്​ എം.പി രാഹുൽ ഗാന്ധിക്കുള്ള ഉപഹാര സമർപ്പണം ജമാഅത്തെ ഇസ്​ലാമി ഹിന്ദ്​  സെക്രട്ടറി ജനറൽ ടി. ആരിഫലി നിർവഹിച്ചു. രാഹുലി​​െൻറ  അസാന്നിധ്യത്തിൽ ഡി.സി.സി പ്രസിഡൻറ്​ ഐ.സി. ബാലകൃഷ്​ണൻ എം.എൽ.എ ഏറ്റുവാങ്ങി. രാഹുലി​​െൻറ സന്ദേശം ബാലകൃഷണൻ അറിയിച്ചു. സ്​പീക്കർ പി. ശ്രീരാമകൃഷ്​ണൻ, മന്ത്രിമാരായ രാമചന്ദ്രൻ  കടന്നപ്പള്ളി, വി.എസ്​. സുനിൽ കുമാർ, പ്രതിപക്ഷ നേതാവ്​ രമേശ്​ ചെന്നിത്തല, പി.വി. അബ്​ദുൽ വഹാബ്​ എം.പി എന്നിവർ വിഡിയോ കോൺഫറൻസിലൂടെ ആശംസ അറിയിച്ചു. 

ഐ.സി. ബാലകൃഷ്​ണൻ എം.എൽ.എ, ജില്ല പഞ്ചായത്ത്​ പ്രസിഡൻറ്​ കെ.ബി. നസീമ, കലക്​ടർക്കു​ വേണ്ടി എ.ഡി.എം യൂസുഫ്​, ജമാഅത്തെ ഇസ്​ലാമി കേരള അസി. അമീർ പി. മുജീബുറഹ്​മാൻ, വെൽഫെയർ പാർട്ടി സംസ്ഥാന വൈസ്​ പ്രസിഡൻറ്​ റസാഖ്​ പാലേരി, പനമരം പഞ്ചായത്ത് പ്രസിഡൻറ് ഷൈനി കൃഷ്ണ, പഞ്ചായത്ത്​ അഗം ജുൽന,  വാദി ഹുദ ഗ്രൂപ് ഓഫ്​ ഇൻസ്​റ്റിറ്റ്യൂഷൻസ്​ ഡയറക്​ടർ എസ്​.എ.പി സലാം തുടങ്ങിയവർ സംസാരിച്ചു. പീപ്ൾസ് ഫൗണ്ടേഷൻ  സെക്രട്ടറി  എം. അബ്​ദുൽ മജീദ്​ പദ്ധതി വിശദീകരിച്ചു. ചെയർമാൻ  എം.കെ. മുഹമ്മദലി സ്വാഗതവും ജമാഅത്തെ ഇസ്​ലാമി ജില്ല  പ്രസിഡൻറ്​ ടി.പി. യൂനുസ്​ നന്ദിയും പറഞ്ഞു. 

പദ്ധതി പൂർത്തീകരണത്തിന്​ ജില്ല ഭരണകൂടം നൽകിയ സേവനങ്ങൾക്ക്​ കലക്​ടർക്കുള്ള ഉപഹാരം ചെയർമാൻ എം.കെ. മുഹമ്മദലിയിൽനിന്ന്​ എ.ഡി.എം ഏറ്റുവാങ്ങി. 
പദ്ധതി പൂർത്തീകരണത്തിന്​ സാമ്പത്തിക സഹായം നൽകിയ വാദി ഹുദ ഗ്രൂപ്​ ഓഫ്​ ഇൻസ്​റ്റിറ്റ്യൂഷൻസ്​ ഡയറക്​ടർ  എസ്​.എ.പി സലാം, പദ്ധതിക്ക്​ മേൽനോട്ടം വഹിച്ച എൻജിനീയർ ഷബീർ അഹ്​മദ്​, നിർമാണം നടത്തിയ അനാർക്​ ബിൽഡേഴ്​സ്​സ്​ ഡയറക്​ടർ മുഹമ്മദ്​ ലൈസ്​ എന്നിവർക്കും​ ഉപഹാരം നൽകി. 
സ്വപ്​നസാഫല്യത്തിന്​ സാക്ഷ്യം വഹിക്കാൻ ജീവിതത്തി​​െൻറ വിവിധ തുറകളിലെ പ്രമുഖർ എത്തി. ഓൺലൈനിൽ ലോകത്തി​​െൻറ വിവിധ ഭാഗങ്ങളിലുള്ളവർ ഉദ്​ഘാടന ചടങ്ങിന്​​ സാക്ഷ്യം വഹിച്ചു.

550 ചതുരശ്ര അടിയിൽ ആറര ലക്ഷം രൂപ ചെലവിലാണ് ഓരോ വീടും നിർമിച്ചത്​. റോഡ്​, വെള്ളം, വൈദ്യുതി സൗകര്യങ്ങളുണ്ട്​. കുറിച്യർമലയിലെ 15 കുടുംബങ്ങളും  പനമരം കബനി നദിക്കരയിലെ 10 കുടുംബങ്ങളുമാണ് വീടുകളുടെ അവകാശികളായത്​. സർക്കാർ സഹായത്തിന് അർഹരാണെങ്കിലും സാങ്കേതിക കാരണങ്ങളാൽ പദ്ധതികളുടെ ഗുണഭോക്താക്കളാകുന്നതില്‍ പ്രയാസം നേരിട്ടവർക്കാണ് മുന്‍ഗണന നല്‍കിയത്. 2012 മുതല്‍ കോഴിക്കോട് കേന്ദ്രീകരിച്ച് കേരളത്തിലുടനീളം പ്രവര്‍ത്തിക്കുന്ന എന്‍. ജി.ഒ ആണ് പീപ്ൾസ് ഫൗണ്ടേഷന്‍.

പനമരം കരിമ്പുമ്മൽ നീരട്ടാടിയിൽ പീപ്ൾസ് ഫൗണ്ടേഷൻ നിർമിച്ച പീപ്ൾസ് വില്ലേജ്​ ഉദ്​ഘാടനം ജമാഅത്തെ ഇസ്​ലാമി ഹിന്ദ്​ സെക്രട്ടറി ജനറൽ ടി. ആരിഫലി നിർവഹിക്കുന്നു