സർക്കാറിനെ പിന്തുണക്കുന്നതിനുള്ള അവസരമായി തെരഞ്ഞെടുപ്പിനെ ജനങ്ങൾ കാണുന്നു -മന്ത്രി കെ.ടി. ജലീൽ

കോഴിക്കോട്​: പ്രളയ കാലത്തും കൊറോണ വൈറസ്​ സമയത്തും ജനങ്ങളെ പട്ടിണിയില്ലാതെ നോക്കിയ സർക്കാറിന്​ ജനങ്ങൾ നൽകുന്ന പിന്തുണയാകും തദ്ദേശ സ്​ഥാപനങ്ങളിലേക്ക്​ ഇടതുപക്ഷ ജനാധിപത്യ മുന്നണിക്ക്​ ​രേഖപ്പെടുത്തുന്ന ഓരോ വോട്ടുമെന്ന്​ മന്ത്രി കെ.ടി. ജലീൽ. വോട്ട്​ രേഖപ്പെടുത്തിയ ശേഷം മാധ്യമങ്ങളോട്​ സംസാരിക്കുകയായിരുന്നു അദ്ദേഹം.

ആരോപണങ്ങൾ തിരിച്ചടിയാകില്ല. പ്രതിപക്ഷം ഉയർത്തികൊണ്ടുവന്ന ആരോപണങ്ങൾ പച്ചക്കള്ളമാണെന്ന തിരിച്ചറിവാണ്​ ഞാൻ ഇവിടെ നിൽക്കുന്നത്​. പറഞ്ഞതെല്ലാം ശരിയായിരുന്നുവെങ്കിൽ ഞാൻ ജയിലിൽ ആകുമായിരുന്നു. ഇതിനു സമാനമാണ്​ മറ്റുള്ളവർക്കെതിരായ ആരോപണങ്ങളും.

ഉയർന്ന പോളിങ്​ ശതമാനം ഇടതുപക്ഷത്തിന്​ ജനങ്ങൾ വോട്ട്​ ചെയ്യാൻ തീര​ുമാനിച്ചുവെന്നതി​െൻറ തെളിവാണ്​. ഒരുപാട്​ കാലമായി വോട്ട്​ ചെയ്യാതിരുന്നവർ പോലും ഇത്തവണ വോട്ട്​ രേഖപ്പെടുത്തുന്നു. അവർക്ക്​ വോട്ട്​ രേഖപ്പെടുത്താതിരിക്കാൻ കഴിയില്ല. എല്ലാവരുടെയും വീടുകളിൽ ക്ഷേമപെൻഷനായും ഭക്ഷ്യകിറ്റായും നിരവധി ആനുകൂല്യങ്ങൾ എത്തിയെന്ന ബോധ്യം അവർക്കുണ്ട്​. അവരെ പരിഗണിക്കുന്ന സർക്കാറിനെ പിന്തുണക്കുന്നതിനുള്ള അവസരമായാണ് ഈ തെരഞ്ഞെടുപ്പിനെ കാണുന്നത്​. അതിനാൽ മലപ്പുറം ജില്ലയിൽ ഉൾപ്പെടെ വലിയ രീതിയിൽ ജനങ്ങൾ വോട്ട്​ രേഖപ്പെടുത്താൻ എത്തുന്നു. വെൽഫെയർ പാർട്ടിയുമായുള്ള സഖ്യം യു.ഡി.എഫിന്​ നഷ്​ടം വരുത്തുമെന്നും അദ്ദേഹം കൂട്ടിച്ചേർത്തു.