ശമ്പള പരിഷ്കരണത്തിന്​ പിന്നാലെ സർവകലാശാല ജീവനക്കാരുടെ പെൻഷനും പരിഷ്​കരിച്ചു

തിരുവനന്തപുരം: സർവകലാശാലകളില്‍നിന്ന്​ വിരമിച്ച ജീവനക്കാരുടെ പെന്‍ഷന്‍ പരിഷ്കരിക്കാന്‍ മന്ത്രിസഭ തീരുമാനിച്ചു. ശമ്പള പരിഷ്കരണത്തോടൊപ്പം 2019 ജൂ​ൈല ഒന്നു മുതല്‍ പെന്‍ഷന്‍ പരിഷ്കരണത്തിനും പ്രാബല്യമുണ്ടാകും. ജൂലൈ ഒന്നുമുതല്‍ പരിഷ്കരിച്ച പെന്‍ഷന്‍ നല്‍കിത്തുടങ്ങും. പാര്‍ട്ട് ടൈം പെന്‍ഷന്‍കാര്‍ക്കും ഈ വ്യവസ്ഥയില്‍ പെന്‍ഷന്‍ നല്‍കും.

മിനിമം പെൻഷൻ 11,500 രൂപയും പരമാവധി പെൻഷൻ 83,400 രൂപയുമാണ്​ ശമ്പള കമീഷൻ ശിപാർശ ചെയ്​തത്​. കുടുംബ പെൻഷൻ കുറഞ്ഞത്​ 11,500 രൂപയും പരമാവധി 50,040 രൂപയും. ഗ്രാറ്റ്വിറ്റിയുടെ പരമാവധി തുക 17 ലക്ഷമായി ഉയർത്തി. 80 വയസ്സ്​​ കഴിഞ്ഞവർക്ക്​ സ്​പെഷൽ കെയർ അലവൻസായി 1000 രൂപ. മെഡിക്കൽ അലവൻസ്​ 500 രൂപ. പാർട്ട്​ടൈം കണ്ടിൻജൻറ്​ ജീവനക്കാർക്ക്​ മിനിമം പെൻഷൻ 5750 രൂപയായിരിക്കും. പരമാവധി 11,485 രൂപയും. കുടുംബ പെൻഷൻ 3450- 6891രൂപ.