പത്തുമണി പൂവ് വിരിഞ്ഞാല്‍ വിവേകി​െൻറ കീശനിറയും

പന്തളം: കുളനട ദാസ് ഭവനില്‍ വിവേക് കുമാറി​​െൻറ വീട്ടിലെത്തിയാല്‍ പ്രകൃതി സ്‌നേഹികളുടെ കണ്ണ്​ തള്ളും. വിവിധ ഇനങ്ങളിലുള്ള നൂറ്റിപതിനഞ്ചിലധികം പത്തുമണി ചെടികളുടെ വന്‍ ശേഖരമാണ് ഇവിടുള്ളത്. വീടിന് മുകളില്‍ ടെറസിലാണ് വിവേകി​​െൻറ പത്തുമണി കൃഷി. ഇന്ത്യയില്‍ എല്ലായിടത്തുനിന്നും തൈകള്‍ ശേഖരിക്കാറുണ്ട്. അതേപോലെ ഇന്ത്യയിലെവിടേക്കും കൊറിയറായും സ്പീഡ് പോസ്​റ്റായും ചെടികള്‍ അയച്ചുകൊടുക്കാറുമുണ്ട് വിവേക്.

സൂര്യപ്രകാശം നന്നായി ലഭിച്ചാല്‍ പൂക്കള്‍ വിരിയുന്ന ഉദ്യാനസസ്യമാണ് പത്തുമണി ചെടി. പോര്‍ട്ടുലാക്ക എന്ന സസ്യകുടുംബത്തില്‍ ഉള്‍പ്പെടുന്ന ഈ ചെറു സസ്യം പൂക്കളുടെ ആകൃതി, നിറം, ഇലകളുടെയും തണ്ടുകളുടെയും നിറം, ഇലകളുടെ ആകൃതി എന്നിവയില്‍ ഒന്നിനൊന്ന് വ്യത്യാസപ്പെട്ടിരിക്കുന്നു.

കല്ലുനീക്കിയ മണ്ണ്, മണ്ണിര കമ്പോസ്​റ്റ്​, ചാണകപ്പൊടി എന്നിവ പോട്ടിങ് മിശ്രിതമായി എടുത്തുവേണം പത്തുമണി ചെടികള്‍ നടേണ്ടത്. ഇതിനായി കരുത്തുള്ള തണ്ടുകള്‍ തെരഞ്ഞെടുക്കണം. ഒരാഴ്ചക്കുള്ളില്‍ തന്നെ ചെടി വേരുപിടിച്ച് വളര്‍ന്നുതുടങ്ങും. 

പത്തുമണി കൃഷിയോടൊപ്പം തന്നെ പച്ചക്കറി കൃഷിയും ചെയ്യുന്നുണ്ട് വിവേക്. ഭാര്യ ധന്യയുടെ വീട്ടിലെ 10 സ​െൻറ്​ സ്ഥലത്ത് എല്ലാ പച്ചക്കറികളും കൃഷിചെയ്യുന്നു, കൂടെ പത്തുമണിയുടെ വലിയൊരു ശേഖരം അവിടെയും ഉണ്ട്. ചെടിയുടെ ഇനം അനുസരിച്ചാണ് വില ഈടാക്കുന്നത്. ഓണ്‍ലൈന്‍ വഴിയാണ് കൂടുതലും വിൽപന. ദൂരസ്ഥലങ്ങളില്‍ ഉള്ളവര്‍ക്ക് തൈകള്‍ സ്പീഡ്പോസ്​റ്റ്​ വഴി അയച്ചുനല്‍കാറാണ് പതിവ്. സ്പിയര്‍മിൻറ്​, നാലുമണി ചെടി, സിന്‍ഡ്രല, ടിയാറ, പോര്‍ട്ടുലാക്ക, പര്‍ഷമെ, ബനാനയെല്ലോ, ആനിയറിന്‍, ടോന്‍ലി തുടങ്ങി 115 ഇനങ്ങളാണ് കാഴ്ചക്കാരെ വിസ്മയിപ്പിക്കുന്നത്. രാവിലെ ഒമ്പതോടുതന്നെ വിവേകി​​െൻറ കൃഷിയിടത്തില്‍ കാഴ്ചക്കാരുടെ തിരക്കാണ്.