എയർ ഇന്ത്യ വിമാനം റദ്ദാക്കി പ്രതിഷേധവുമായി യാത്രക്കാർ

കോഴിക്കോട്​: കോഴിക്കോട്​ നിന്ന്​ ദോഹയിലേക്കുള്ള എയർ ഇന്ത്യ വിമാനം റദ്ദാക്കി. ഇന്ത്യ-ഖത്തർ എയർ ബബിൾ കരാർ പുതുക്കുന്നതിലെ അവ്യക്തതയെ തുടർന്നാണ്​ വിമാനം റദ്ദാക്കിയത്​. വിമാനം മുടങ്ങിയതിൽ യാത്രക്കാർ പ്രതിഷേധിച്ചു​.

ജൂൺ 30 ബുധനാഴ്ച അർധരാത്രി വരെയായിരുന്നു നിലവിലെ കരാർ. എന്നാൽ ഇത് പുതുക്കാൻ വൈകിയതോടെ വ്യാഴാഴ്ച പുലർച്ചെ മുതൽ ഇന്ത്യയിലേക്കും തിരിച്ചു മുള്ള വിമാനയാത്രകൾ തടസപ്പെടുകയാണ്​.

കണ്ണൂർ , കൊച്ചി ഉൾപ്പെടെ കേരളത്തിലേക്ക് പുറപ്പെടാനിരുന്ന ഇൻഡിഗോയുടെ സർവീസും മുടങ്ങിയതോടെ നിരവധി മലയാളികളുടെ യാത്രയും തടസ്സപ്പെട്ടിരിക്കുകയാണ്​. അതെ സമയം പ്രതിസന്ധി പരിഹരിക്കാൻ സർക്കാർ തലത്തിൽ ചർച്ചകൾ പുരോഗമിക്കുകയാണ്​.

സാങ്കേതിക തടസം കാരണമാണ് കരാര്‍ പുതുക്കുന്നത് വൈകുന്നതെന്നാണ് വിവരം. ഇന്നു വൈകിട്ടോടെ പ്രശ്ന പരിഹാരമാകുമെന്നാണ് റിപ്പോര്‍ട്ടുകള്‍. കോവിഡ് നിയന്ത്രണങ്ങളുടെ ഭാഗമായുള്ള വിമാന വിലക്ക് നിലനില്‍ക്കുന്നതിനിടയിലും പ്രത്യേകാനുമതിയുള്ളവര്‍ക്ക് യാത്രാനുമതി നല്‍കുന്നതിനായാണ് ഇന്ത്യ ഖത്തറുമായി എയര്‍ ബബിള്‍ കരാര്‍ ഉണ്ടാക്കിയത്.