ഓടിക്കൊണ്ടിരുന്ന കെ.എസ്.ആർ.ടി.സി ബസിന്റെ മുന്നിലെ ചില്ല് തകർത്ത് യാത്രക്കാരൻ പുറത്തുചാടി

മാനന്തവാടി: ഓടിക്കൊണ്ടിരുന്ന കെ.എസ്.ആർ.ടി.സി ബസിന്റെ മുന്നിലെ ചില്ല് തകർത്ത് യാത്രക്കാരൻ പുറത്തേക്ക് ചാടി. റോഡിൽ വീണ് തലക്ക് സാരമായി പരിക്കേറ്റ ഇയാളെ കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി. അതിഥി തൊഴിലാളിയായ ഝാർഖണ്ഡ് സ്വദേശി മനോജ് കിഷൻ (28) ആണ് ബസിന്‍റെ ചില്ല് തകർത്ത് പുറത്തുചാടിയത്.

ഇന്ന് രാവിലെ ഏഴരയോടെ മാനന്തവാടി ദ്വാരകയിൽ വെച്ചാണ് സംഭവം. കോഴിക്കോട് നിന്ന് കയറിയ ഇയാൾ ചുണ്ടേൽ മുതൽ അസ്വസ്ഥത പ്രകടിപ്പിച്ചിരുന്നു എന്ന് ബസ് ജീവനക്കാർ പറയുന്നു. ദ്വാരകയിൽ വെച്ച് മുന്നിലേക്ക് വന്ന ഇയാൾ തലകൊണ്ട് ചില്ല് ഇടിച്ച് പൊളിച്ച് റോഡിലേക്ക് ചാടുകയായിരുന്നു.

തലയ്ക്ക് ഗുരുതര പരിക്കേറ്റ മനോജിനെ ആദ്യം മാനന്തവാടി മെഡിക്കൽ കോളജിൽ പ്രവേശിപ്പിച്ച ശേഷം വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളജിലേക്ക് മാറ്റി.