പാർത്ഥസാരഥി ​ക്ഷേത്രം ഏറ്റെടുത്തത്​ സർക്കാറല്ല, മലബാർ ദേവസ്വമെന്ന്​ മുഖ്യമന്ത്രി 

തിരുവന്തപുരം: ഗുരുവായുരിലെ പാർത്ഥസാരഥി ക്ഷേത്രം ഏറ്റെടുത്തത്​ സര്‍ക്കാറല്ല മലബാർ ദേവസ്വം ബോർഡാണെന്ന്​ മുഖ്യമന്ത്രി. ബോര്‍ഡ് ക്ഷേത്രം ഏറ്റെടുത്തത്​ അഴിമതി ​നില നിന്ന സാഹചര്യത്തിലും കോടതി വിധിയുടെ അടിസ്ഥാനത്തിലുമാണെന്നും മുഖ്യമന്ത്രിയുടെ ഒാഫീസ്​ പുറത്തിറക്കിയ പത്രക്കുറിപ്പിൽ ചൂണ്ടിക്കാട്ടുന്നു.

സംഭവവുമായി ബന്ധപ്പെട്ട്​ ക്ഷേത്രങ്ങൾക്ക്​ രക്ഷയില്ല എന്ന നിലയിൽ പ്രചാരണം നടത്തി സമൂഹത്തിൽ വർഗീയ ധ്രുവീകരണം ഉണ്ടാക്കുക എന്നതാണ്​ ചിലരുടെ ലക്ഷ്യം. വിശ്വസികൾ അടക്കമുള്ള പൊതുസമൂഹം ദുഷ്​പ്രചാരണങ്ങളാൽ തെറ്റിദ്ധരിക്കപ്പെടുകയില്ലെന്ന്​ ഉറപ്പുണ്ടെന്നും സർക്കാർ വ്യക്​തമാക്കി.

2010ലാണ്​ നടത്തിപ്പിലെ അഴിമതികളും അപകാതകളും ചൂണ്ടിക്കാട്ടി ക്ഷേത്രം മലബാർ ദേവസ്വം ബോർഡ്​ ഏറ്റെടുക്കണമെന്ന്​ ആവശ്യപ്പെട്ട് നാട്ടുകാർ​ ഹൈകോടതിയിൽ ഹരജി സമർപ്പിക്കുന്നത്​. ഇൗ ഹരജിയുടെ അടിസ്ഥാനത്തിലാണ്​ ക്ഷേത്രം ഏറ്റെടുക്കാൻ തീരുമാനമായത്​. എന്നാൽ കോടതി വിധി നടപ്പാക്കാനായി എത്തിയ ഉദ്യോഗസ്ഥരെ തടയുന്ന സമീപനമാണ്​ ആർ.എസ്​.എസ്​ പ്രവർത്തകരിൽ നിന്നും ഉണ്ടായതെന്നും മുഖമന്ത്രിയുടെ ഒാഫീസ്​ കുറ്റപ്പെടുത്തുന്നു.