പെരിയാറിലെ പാർക്കിങ്​ തമിഴ്​നാടിന്‍റെ പാട്ടഭൂമിയിലോ? സർവേക്ക്​ സുപ്രീംകോടതി നിർദേശം

ന്യൂഡൽഹി: പെരിയാർ കടുവ സ​ങ്കേതത്തിൽ എത്തുന്ന സഞ്ചാരികൾക്കായി കേരളം ഒരുക്കിയ മെഗാ പാർക്കിങ്​ തമിഴ്​നാടിന്‍റെ പാട്ടഭൂമിയിലാണോ എന്നറിയാൻ സർവേ നടത്താൻ നിർദേശിച്ച്​ സുപ്രീംകോടതി. രണ്ടു സംസ്ഥാനങ്ങളിലെയും ബന്ധപ്പെട്ട ഉദ്യോഗസ്ഥരുടെ സാന്നിധ്യത്തിൽ മൂന്നു മാസത്തിനകം സർവേ പൂർത്തിയാക്കി റിപ്പോർട്ട്​ നൽകാൻ സർവേ ഓഫ്​ ഇന്ത്യക്കാണ്​ നിർദേശം. ജി.പി.എസ്​ അടക്കം നവീന സംവിധാനങ്ങൾ ഉപയോഗിച്ച്​ അവ്യക്തതകളില്ലാതെ സർവേ നടത്തണമെന്നും ജസ്റ്റിസുമാരായ അഭയ്​ ഓക, പങ്കജ്​ മിത്തൽ എന്നിവർ പറഞ്ഞു.

1886ലെ മുല്ലപ്പെരിയാർ കരാർ പ്രകാരം തങ്ങൾക്ക്​ കിട്ടിയ പാട്ടഭൂമിയിലാണ്​ പാർക്കിങ്​ സൗകര്യം ഒരുക്കിയിരിക്കുന്നതെന്ന്​ ഹരജിക്കാരായ തമിഴ്​നാട്​ സർക്കാർ വാദിച്ചു. എന്നാൽ, ബ്രിട്ടീഷുകാരും തിരുവിതാംകൂർ രാജകുടുംബവുമായി 1886ൽ ഒപ്പുവെച്ച കരാറിൽ പെരിയാറിലെ ഭൂമിയുടെ അവകാ​ശത്തെക്കുറിച്ച്​ പരാമർശിച്ചിട്ടില്ലെന്ന്​ കേരളം വിശദീകരിച്ചു.