'ഷൈനി ജോലിക്കായി സമീപിച്ചത് 12 ആശുപത്രികളെ, സഭ കനിഞ്ഞില്ല, മരിച്ചിട്ട് ഒരു പത്രക്കുറിപ്പുപോലും ഇറക്കിയില്ല'; ക്നാനായ സഭക്കെതിരെ ഇടവകസമൂഹം

കോട്ടയം: ഏറ്റുമാനൂരിൽ അമ്മയും രണ്ടു പെൺമക്കളും ട്രെയിനിനുമുന്നിൽ ചാടി ജീവനൊടുക്കിയ സംഭവത്തിൽ ക്നാനായ സഭക്കെതിരെ വൻപ്രതിഷേധവുമായി മള്ളൂശ്ശേരി സെന്റ് തോമസ് ഇടവകാംഗങ്ങൾ. ഞായറാഴ്ച രാവിലെ എട്ടരക്ക്​ കുർബാനക്കുശേഷം ക്നാനായ പള്ളി കവാടത്തിൽ ഇടവകസമൂഹം പ്രതിഷേധം സംഘടിപ്പിച്ചു. സഭ നേതൃത്വം ഇടപെട്ടിരുന്നെങ്കിൽ ഷൈനിയുടെയും മക്കളുടെയും ആത്മഹത്യ ഒഴിവാക്കാമായിരുന്നുവെന്ന്​ പ്രതിഷേധക്കാർ കുറ്റപ്പെടുത്തി.

‘ബി.എസ്​സി നഴ്​സിങ്​ പൂർത്തിയായ ഷൈനി 12 ആശുപത്രികളെയാണ്​ ജോലിക്കായി സമീപിച്ചത്​. സഭ ഇടപെട്ട്​ ജോലി നൽകാൻ കഴിയുമായിരുന്നു. കുടുംബപ്രശ്നങ്ങൾ പള്ളി മുഖേന പരിഹരിക്കാൻ കഴിയുമായിരുന്നു. ആരും ഒന്നും ചെയ്തില്ല. സഭ മേലധ്യക്ഷർ ഇതുവരെ ഒരു പത്രക്കുറിപ്പുപോലും ഇറക്കിയില്ല. ഷൈനിക്കും മക്കൾക്കും ഇവിടെ നീതി കിട്ടിയില്ല. ​​ദൈവത്തിന്‍റെ കോടതിയിൽ കുറ്റക്കാർക്ക്​ ശിക്ഷ ലഭിക്കട്ടെ. മരണത്തിൽ നമുക്കെല്ലാവർക്കും പങ്കുണ്ട്​. കുറ്റക്കാരെ കണ്ടെത്തി ശിക്ഷിക്കണം’ -ഇടവകാംഗങ്ങൾ ആവശ്യപ്പെട്ടു.

പ്രതിഷേധത്തിനു മുന്നോടിയായി അനുശോചനയോഗവും ചേർന്നു. സ്ത്രീകളും കുട്ടികളുമടക്കം നിരവധിപേർ പങ്കാളികളായി. പള്ളിക്കുമുന്നിൽ ഇവർക്ക്​ ആദരാഞ്ജലി അർപ്പിച്ച്​ ഇടവകസമൂഹം ബാനറും ഉയർത്തിയിരുന്നു. മള്ളൂശ്ശേരി സെന്റ് തോമസ് പള്ളി സംയുക്ത സംഘടനകൾ, സെന്റ് തോമസ് കുടുംബയോഗം, ലിജിയൻ ഓഫ് മേരി, കെ.സി.സി, കെ.സി.ഡബ്ല്യു.എ, വിൻസെന്റ് ഡി പോൾ തുടങ്ങിയ സംഘടനകളുടെ നേതൃത്വത്തിലാണ് പ്രതിഷേധം സംഘടിപ്പിച്ചത്​.

തൊടുപു​ഴ ചുങ്കം ക്​നാനായ പള്ളി ഇടവകാംഗങ്ങളാണ്​ ഷൈനിയും മക്കളായ അലീനയും ഇവാനയും. കഴിഞ്ഞ 28നാണ്​ ഇവരെ ഏറ്റുമാനൂർ പാറോലിക്കൽ റെയിൽവേ ഗേറ്റിനു സമീപം മരിച്ചനിലയിൽ കണ്ടെത്തിയത്​. ആത്​മഹത്യ പ്രേരണക്കുറ്റത്തിന്​ അറസ്റ്റിലായ ഭർത്താവ്​ നോബി ലൂക്കോസ്​ റിമാൻഡിലാണ്​. ഭർത്താവിന്‍റെ ഉപദ്രവത്തെതുടർന്ന്​ ഷൈനിയും മക്കളും ഏറ്റുമാനൂരിലെ വീട്ടിലായിരുന്നു താമസം.