ശബരിമലയിൽ പഞ്ചലോഹ വിഗ്രഹം: ദേവസ്വം ബോർഡിന്റെ അനുമതിക്ക് സ്റ്റേ; വിഗ്രഹത്തിന്‍റെ പേരിൽ പണപ്പിരിവ് തുടങ്ങിയതിൽ പൊലീസ് അന്വേഷണം വേണമെന്ന് ഹൈകോടതി

കൊച്ചി: ശബരിമല ക്ഷേത്രാങ്കണത്തിൽ അയ്യപ്പന്റെ പഞ്ചലോഹ വിഗ്രഹം സ്ഥാപിക്കാൻ തിരുവിതാംകൂർ ദേവസ്വം ബോർഡ്​ നൽകിയ അനുമതി​ ഹൈകോടതി സ്​റ്റേ ചെയ്തു. ദേവസ്വം ബോർഡ്​ അനുമതിയുടെ മറവിൽ തമിഴ്‌നാട് ഈറോഡിലെ ലോട്ടസ് മൾട്ടി സ്‌പെഷാലിറ്റി ഹോസ്പിറ്റൽ ചെയർമാൻ ഡോ. ഇ.കെ. സഹദേവൻ പണപ്പിരിവ് തുടങ്ങിയതിൽ പൊലീസ് അന്വേഷണം നടത്താനും ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് എസ്. മുരളീ കൃഷ്ണ എന്നിവരടങ്ങിയ ബെഞ്ച്​ ഉത്തരവിട്ടു. വിഗ്രഹത്തിന്റെ പേരിൽ സ്വകാര്യ ട്രസ്റ്റിന്റെ അക്കൗണ്ടിലെത്തിയ സംഭാവന ആരും പിൻവലിക്കുന്നില്ലെന്ന് ശബരിമല ചീഫ് പൊലീസ് കോഓഡിനേറ്റർ ഉറപ്പുവരുത്തണം.

വിഗ്രഹത്തിന്‍റെ പേരിൽ സഹദേവൻ പണപ്പിരിവ് തുടങ്ങിയതിനെക്കുറിച്ച്​ ശബരിമല സ്പെഷൽ കമീഷണർ നൽകിയ റിപ്പോർട്ടിനെത്തുടർന്നാണ്​ വിഷയം കോടതി പരിഗണിച്ചത്. വിഗ്രഹം സ്ഥാപിക്കുന്നതിനു കത്തി‌ടപാട് നടന്നെങ്കിലും അനുമതി നൽകിയിട്ടില്ലെന്നായിരുന്നു ദേവസ്വം ബോർഡ്​ നിലപാട്​. എന്നാൽ, വിഗ്രഹം സ്ഥാപിക്കാനുള്ള അപേക്ഷക്ക്​ ബോർഡ് പ്രസിഡന്റ് അംഗീകാരം നൽകിയതായി ഫയലുകളിൽനിന്ന് വ്യക്തമാകുന്നതായി കോടതി പറഞ്ഞു.

ദേവസ്വം കമീഷണറുടെ റിപ്പോർട്ടിന് കാത്തുനിൽക്കാതെയാണ് ജൂലൈ ഒന്നിന് അപേക്ഷ അംഗീകരിച്ചത്. തന്ത്രിയുടെ അഭിപ്രായം തേടിയോ എന്ന്​ വ്യക്തമല്ലെങ്കിലും ലാഘവത്തോടെയാണ് ബോർഡ് അനുവാദം നൽകിയതെന്നതിന്​ വ്യക്തതയുണ്ടെന്ന്​ വിലയിരുത്തിയ കോടതി, തുടർനടപടി രണ്ടാഴ്ചത്തേക്ക്​ സ്റ്റേ ചെയ്യുകയായിരുന്നു. ക്ഷേത്രാങ്കണത്തിൽ വിഗ്രഹ സങ്കൽപത്തിന്‍റെ പ്രസക്തിയെന്തെന്നും കോടതി ചോദിച്ചു.

വിഗ്രഹത്തിന്റെ പേരിൽ വലിയ തുക ‘റോട്ടറി ഫ്രീഡം ഇന്ത്യ’ ട്രസ്റ്റിന്റെ ബാങ്ക് അക്കൗണ്ടിലെത്തിയതായി സർക്കാർ അറിയിച്ചു. ദേവസ്വം ബോർഡ്​ ഉദ്യോഗസ്ഥൻ ഇതുവരെ പൊലീസിൽ പരാതി നൽകാത്തതിനെ വിമർശിച്ച കോടതി, പമ്പ എസ്.എച്ച്.ഒയുമായി ബന്ധപ്പെട്ട് ഇതിന് നടപടിയെടുക്കാൻ നിർദേശിച്ചു. എതിർകക്ഷിയായ ഡോ. സഹദേവന് ഇ-മെയിലിൽ നോട്ടീസ് നൽകിയെങ്കിലും കൈപറ്റിയില്ല. പുതിയ നോട്ടീസ് സ്പീഡ് പോസ്റ്റിൽ അയക്കാൻ രജിസ്ട്രിക്ക് കോടതി നിർദേശം നൽകി. ദേവസ്വം സെക്രട്ടറിയോടും വിശദീകരണം തേടി. വിഷയം അടുത്തയാഴ്ച പരിഗണിക്കുന്നതുവരെ ഫയലുകൾ കോടതിയുടെ സുരക്ഷിത കസ്റ്റഡിയിൽ സൂക്ഷിക്കാനും നിർദേശിച്ചു.