കന്യാസ്ത്രീകളുടെ അറസ്റ്റിന്‍റെ ലക്ഷ്യം ന്യൂനപക്ഷങ്ങളെ പേടിപ്പെടുത്തൽ; ഭരണകൂട വേട്ടയാടലിനെതിരെ പോരാട്ടം തുടരണം -സാദിഖലി തങ്ങൾ

തിരുവനന്തപുരം: ഛത്തിസ്​ഗഢി​ലെ കന്യാസ്ത്രീകളുടെ അറസ്റ്റിലൂടെ ന്യൂനപക്ഷങ്ങളെ പേടിപ്പെടുത്തുകയാണ്​ ഭരണകൂടം ലക്ഷ്യമിടുന്നതെന്ന് മുസ് ലിം ലീഗ് സംസ്ഥാന അധ്യക്ഷൻ പാണക്കാട്​ സാദിഖലി ശിഹാബ്​ തങ്ങൾ. നീതിനിഷേധം സമ്പൂർണമായി അവസാനിക്കും വരെ ഒറ്റക്കെട്ടായി സമരവുമായി മുന്നോട്ടു പോകണമെന്നും സാദിഖലി തങ്ങൾ പറഞ്ഞു.

കന്യാസ്ത്രീകൾക്കെതിരെ നടത്തിയ നീക്കങ്ങൾ ഭരണഘടനക്കെതിരായ നീക്കമാണ്. ഭരണഘടനയും ബഹുസ്വരതയും അംഗീകരിക്കാൻ പറ്റാത്തവരാണ് ഈ ശ്രമങ്ങൾക്ക്​ പിന്നിൽ. ഭരണത്തിലുള്ളവരുടെ പിന്തുണ ഇത്തരക്കാർക്കുണ്ട്​.

ന്യൂനപക്ഷങ്ങൾക്കും പിന്നാക്ക വിഭാഗങ്ങൾക്കുമെതിരെ കിട്ടാവുന്ന അവസരങ്ങളിലൊക്കെ ഭരണകൂടം ഓരോരോ നിയമങ്ങൾ പാസാക്കുകയാണ്. ജനങ്ങളെ വേട്ടയാടുന്ന ഭരണകൂട നടപടിക്കും അനീതിക്കും അതിക്രമങ്ങൾക്കുമെതിരെ ശക്​തമായ പോരാട്ടം തുടരണമെന്നും സാദിഖലി തങ്ങൾ ആവശ്യപ്പെട്ടു.

ഛത്തിസ്ഗഢ്, അസം എന്നിവിടങ്ങളിലെ ന്യൂനപക്ഷ വേട്ട​ക്കെതിരെ യൂത്ത് ലീഗ് പാളയം രക്​തസാക്ഷി മണ്ഡപത്തിൽ സംഘടിപ്പിച്ച പ്രതിഷേധ സദസ്സ് ഉദ്ഘാടനം ചെയ്യുകയായിരുന്നു അദ്ദേഹം.