റോഡ് മോശമാണെങ്കിൽ ടോൾ പിരിക്കാൻ പാടില്ല; നൽകുന്ന പണത്തിന്​ സുഗമമായ റോഡ് യാത്ര ഉറപ്പാക്കണമെന്ന് ഹൈകോടതി

കൊച്ചി: ടോൾ ബൂത്തിൽ പണം നൽകുന്ന യാത്രക്കാർക്ക്​ ദേശീയ പാതയുടെ സേവനം നിഷേധിക്കാനാവില്ലെന്ന്​​ ഹൈകോടതി.

തൃശൂർ -ഇടപ്പള്ളി ദേശീയപാതയിൽ ഗതാഗതക്കുരുക്ക് രൂക്ഷമായിട്ടും പാലിയേക്കരയിൽ ടോൾ പിരിവ് തുടരുന്നതിനെതിരായ ഹരജിയിലാണ്​ ജസ്റ്റിസ് എ. മുഹമ്മദ് മുഷ്താഖ്, ജസ്റ്റിസ് ജോൺസൺ ജോൺ എന്നിവരടങ്ങുന്ന ഡിവിഷൻ ബെഞ്ചിന്‍റെ നിരീക്ഷണം. സേവനം മോശമായിട്ടും ടോൾ നൽകേണ്ടിവരുന്നത്​ ചൂണ്ടിക്കാട്ടി കോൺഗ്രസ് നേതാവ് ഷാജി കോടകണ്ടത്താണ്​ ഹരജി നൽകിയത്.

റോഡ് മോശമായി യാത്രാ സൗകര്യം നൽകാൻ കഴിയില്ലെങ്കിൽ ടോൾ പിരിക്കാനും പാടില്ലെന്ന് കോടതി വാക്കാൽ നിരീക്ഷിച്ചു. കേന്ദ്ര സർക്കാറിന്‍റെ വിശദീകരണം തേടിയ കോടതി, ഹരജി വീണ്ടും 25ന്​ പരിഗണിക്കാൻ മാറ്റി.

പാത സ്തംഭിക്കുന്ന സഹചര്യമുണ്ടായാലല്ലാതെ ഗതാഗതക്കുരുക്കിന്റെ പേരിൽ ടോൾ പിരിവ്​ നിർത്താനാവില്ലെന്ന് കേന്ദ്രത്തിന് വേണ്ടി അസി. സോളിസിറ്റർ ജനറൽ എ.ആർ.എൽ. സുന്ദരേശൻ കോടതിയെ അറിയിച്ചു. രണ്ടും തമ്മിൽ ബന്ധപ്പെടുത്താനാവില്ലെന്നും വാദിച്ചു. എന്നാൽ, ദേശീയ പാതയിലെ നിർമാണവുമായി ബന്ധപ്പെട്ടാണ്​ ഗതാഗതക്കുരുക്കെന്നും സ്വാഭാവിക പ്രതിഭാസമല്ലെന്നും കോടതി പറഞ്ഞു. നൽകുന്ന പണത്തിന്​ സേവനം നൽകാൻ ​ദേശീയപാത അതോറിറ്റി ബാധ്യസ്ഥരാണ്​. തുടർന്ന്,​ വിശദീകരണത്തിന്​ കേന്ദ്രം സമയം തേടുകയായിരുന്നു.

ദേശീയപാത അതോറിറ്റിയും കരാർ കമ്പനിയും വൻതോതിൽ ലാഭം ​കൊയ്​ത സാഹചര്യത്തിൽ പാലിയേക്കരയിലെ ടോൾപിരിവ് അവസാനിപ്പിക്കണമെന്ന ആവശ്യവും ഹരജിയിൽ ഉന്നയിച്ചിട്ടുണ്ട്.