ഓഡിറ്റോറിയത്തിൽ പാകിസ്താൻ പതാക; ഉടമക്കെതിരെ കേസ്​

ഉദയംപേരൂർ: ഓഡിറ്റോറിയത്തിൽ നിന്നും പാകിസ്താൻ പതാക കണ്ടെടുത്ത സംഭവത്തിൽ ഓഡിറ്റോറിയം ഉടമക്കെതിരെ പൊലീസ് കേസെടുത്തു. തൃപ്പൂണിത്തുറ കണ്ടനാട് കവലക്കടുത്തുള്ള ജീസസ് ജനറേഷൻ ഓഡിറ്റോറിയം ഉടമ കുരീക്കാട് ജെയ് നഗർ കല്ലിങ്കത്തറ വീട്ടിൽ ദീപു ജേക്കബിനെതിരെയാണ്​ (44) ഉദയംപേരൂർ പൊലീസ് കേസെടുത്തത്​.

കഴിഞ്ഞ ഏഴിന് ഓഡിറ്റോറിയത്തിൽ നടന്ന പാസ്റ്റർമാരുടെ യോഗത്തിൽ വിവിധ രാജ്യങ്ങളുടെ പതാകക്കൊപ്പം പാക്​ പതാകയും പരസ്യമായി പ്രദർശിപ്പിച്ച് ആരാധന നടത്തിയെന്നാണ് കേസ്. വിവരമറിഞ്ഞ് പരിശോധനക്കെത്തിയ പൊലീസ്, ഓഡിറ്റോറിയത്തിന്‍റെ ശുചിമുറിക്കടുത്ത്​ നിന്ന്​ പാക്​ പതാക കണ്ടെടുത്തു. തുടർന്ന്​ ഇത്​ കസ്റ്റഡിയിലെടുത്തു.

ഒന്നര വർഷം മുമ്പ്​ ചൈനയിൽ നിന്നാണ്​ 20 രാജ്യങ്ങളുടെ പതാക വാങ്ങിയതെന്നും അതിലുണ്ടായിരുന്നതാണ്​ പാക്​ പതാകയെന്നും​ ഉടമ പൊലീസിനോട്​ വിശദീകരിച്ചു. ഒന്നര വർഷമായി വിവിധ രാജ്യങ്ങൾക്കായുള്ള പ്രാർഥനയിൽ ഇത്​ ഇവിടെ ഉപയോഗിച്ചു വരുന്നുണ്ടെന്നും അദ്ദേഹം വ്യക്​തമാക്കി.