പി. ബാലചന്ദ്ര​ന്റെ ഫേസ്ബുക്ക് പോസ്റ്റ് വിശ്വാസികളെ അവഹേളിക്കുന്നത് -വി.ഡി. സതീശൻ

തിരുവനന്തപുരം: തൃശൂർ എം.എൽ.എയും സി.പി.എം നേതാവുമായ പി. ബാലചന്ദ്രന്റെ ഫേസ്ബുക്ക് വിശ്വാസികളെ വേദനിപ്പിക്കുന്നും വർഗീയവാദികൾക്ക് ആയുധം നൽകുന്നതുമാണെന്ന് പ്രതിപക്ഷ നേതാവ് വി.ഡി. സതീശൻ. ഇക്കാര്യത്തിൽ ഇടതുമുന്നണി നിലപാട് വ്യക്തമാക്കണം. ദൈവ സങ്കൽപത്തെ അവഹേളിക്കുന്ന പോസ്റ്റാണത്. ഒരു ജനപ്രതിനിധിയിൽ നിന്ന് ഉണ്ടാകാൻ പാടില്ലാത്ത പരാമർശങ്ങളാണ് പി. ബാലചന്ദ്രൻ നടത്തിയതെന്നും വി.ഡി. സതീശൻ ചൂണ്ടിക്കാട്ടി.

ഫേസ്ബുക്ക് പോസ്റ്റ് പിൻവലിച്ചത് കൊണ്ട് അതുണ്ടാക്കിയ മുറിവുകൾ ഇല്ലാതാകുന്നില്ല. ഭക്തിയും വിശ്വാസവും ഓരോരുത്തരുടേയും വ്യക്തിപരമായ കാര്യങ്ങളാണ്. ക്ഷേത്രാരാധനയിൽ വിശ്വസിക്കുന്നില്ലെന്ന് പരസ്യ നിലപാടെടുത്തവർ തുടർച്ചയായി വിശ്വാസികളുടെ വികാരങ്ങളെ മുറിവേൽപ്പിക്കുന്നത് അംഗീകരിക്കാനാകില്ലെന്നും പ്രതിപക്ഷ നേതാവ് പറഞ്ഞു.