സമരക്കാർക്കുനേരെ പൊലീസ്​ നരനായാട്ട്​: നിയമസഭ ബഹിഷ്കരിച്ച്​ പ്രതിപക്ഷം മാടപ്പള്ളിയിലേക്ക്​

തിരുവനന്തപുരം: ചങ്ങനാശ്ശേരി മാടപ്പള്ളിയിൽ സിൽവർ ലൈൻ വിരുദ്ധ സമരത്തിനെതിരായ പൊലീസ് നരനായാട്ടിൽ പ്രതിഷേധിച്ച് നിയമസഭ ബഹിഷ്കരിച്ച്​ പ്രതിപക്ഷം. മുഖ്യമന്ത്രിക്ക്​ അധികാരത്തിന്‍റെ ധാർഷ്​ട്യം, സിൽവർ ലൈൻ വിരുദ്ധ സമരങ്ങളെ ചോരയിൽ മുക്കിക്കൊല്ലാൻ അനുവദിക്കില്ല എന്നീ വാചങ്ങൾ എഴുതിയ ബാനറും പിടിച്ചാണ്​ പ്രതിപക്ഷ അംഗങ്ങൾ നിയമസഭയിൽനിന്ന്​ ഇറങ്ങിപ്പോന്നത്​. രാവിലെ ആരംഭിച്ച ചോദ്യോത്തര വേളയിലും പ്ലക്കാർഡുകളും ബാനറുകളും ഉയർത്തി പ്രതിപക്ഷ അംഗങ്ങൾ പ്രതിഷേധിച്ചിരുന്നു. പിന്നാലെയാണ്​ സഭ വിട്ടിറങ്ങിയത്​.

ഇത്​ സ്ത്രീ വിരുദ്ധ സർക്കാറാണെന്ന്​ പ്രതിപക്ഷ നേതാവ്​ വി.ഡി. സതീശൻ നിയമസഭയിൽ പറഞ്ഞു. ഭരണപക്ഷത്തിന്‍റെ ഭീഷണിക്ക്​ വഴങ്ങില്ലെന്നും അദ്ദേഹം ഓർമിപ്പിച്ചു.

ഇതിന്​ മറുപടിയുമായി മുഖ്യമന്ത്രി പിണറായി വിജയൻ രംഗത്തെത്തി. ചോദ്യോത്തര വേള സർക്കാറിനെ അധിക്ഷേപിക്കാനായി പ്രതിപക്ഷ നേതാവ്​ ഉപയോഗിക്കുകയാണ്​. അപവാദങ്ങൾ പ്രചരിപ്പിക്കാനാണ്​ പ്രതിപക്ഷത്തിന്​ താൽപ്പര്യമെന്നും മുഖ്യമ​ന്ത്രി പറഞ്ഞു.

ഇതോടെ സഭ ബഹിഷ്കരിക്കുകയാണെന്ന്​ പ്രതിപക്ഷം അറിയിച്ചു. തുടർന്ന്​ പുറത്തേക്ക്​ പോകുന്നതിനിടെ സഭയിൽ വെച്ച്​ വീണ്ടും മുദ്രാവാക്യങ്ങൾ വിളിക്കാൻ തുടങ്ങി. ഇതിനെ സ്പീക്കർ എം.ബി. രാജേഷ്​ എതിർത്തു. സഭ ബഹിഷ്കരിച്ച ശേഷം വീണ്ടും നടുത്തളത്തിലിറങ്ങി മുദ്രാവാക്യം വിളിക്കുന്നത്​ അച്ചടക്കലംഘനമാണെന്ന്​ സ്പീക്കർ പറഞ്ഞു. സഭയിൽ ബോധപൂർവം പ്രകോപനം സൃഷ്ടിക്കരുതെന്നും അദ്ദേഹം ഓർമിപ്പിച്ചു. ​

കൂടാതെ സഭാ നടപടികൾ തൽക്കാലത്തേക്ക്​ നിർത്തിവെക്കുകയും ചെയ്തു. സിൽവർ ലൈൻ സംബന്ധിച്ച്​ വ്യാഴാഴ്ചയും നിയമസഭയിൽ വലിയ രീതിയിൽ പ്രതിഷേധം ഉണ്ടായിരുന്നു.

സഭ ബഹിഷ്കരിച്ച്​ പ്രതിപക്ഷ നേതാവിൻ്റെ നേതൃത്വത്തിൽ യു.ഡി.എഫ് നേതാക്കൾ മാടപ്പള്ളിയിലേക്ക് പോകും. വെള്ളിയാഴ്ച ഉച്ചയോടെ മാടപ്പള്ളിയിൽ എത്തും