ഉമ്മൻ ചാണ്ടിയെ വിദഗ്ധ ചികിത്സക്കായി ബംഗളൂരുവിലേക്ക് ​മാറ്റി

തിരുവനന്തപുരം: ന്യൂമോണിയയെ തുടർന്ന് നെയ്യാറ്റിൻകര ചികിത്സയിലായിരുന്ന മുൻ മുഖ്യമന്ത്രി ഉമ്മൻ ചാണ്ടിയെ വിദഗ്ധ ചികിത്സക്കായി ബംഗളൂരുവിലേക്ക് ​കൊണ്ടുപോയി. ചാർട്ടേഡ് വിമാനത്തിലാണ് ഉമ്മൻ ചാണ്ടിയെ കൊണ്ടുപോയത്.

അതിനിടെ ചികിത്സയുമായി ബന്ധപ്പെട്ട് കുടുംബത്തിനെതിരെ ഉയർന്ന ആരോപണങ്ങൾ അടിസ്ഥാനമില്ലാത്തതാണെന്ന് ഉമ്മൻ ചാണ്ടി പറഞ്ഞു.

തനിക്ക് ചികിത്സ ലഭിച്ചിട്ടുണ്ട്. നിംസ് ആശുപത്രിയിൽ നല്ല ചികിത്സ ലഭിച്ചു. വന്നപ്പോഴേതിനേക്കാൾ ആരോഗ്യം മെച്ചപ്പെട്ടുവെന്നും അദ്ദേഹം പറഞ്ഞു.

അർബുദ രോഗവുമായി ബന്ധപ്പെട്ട തുടർ ചികിത്സക്കാണ് ഉമ്മൻ ചാണ്ടിയെ ബംഗളൂരുവിലേക്ക് കൊണ്ടുപോകുന്നത്. എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ ഉമ്മന്‍ചാണ്ടിയെ കഴിഞ്ഞ ദിവസം ആശുപത്രിയിലെത്തി സന്ദര്‍ശിച്ചിരുന്നു. തുടർ ചികിത്സയുടെ മുഴുവൻ ചെലവും കോൺഗ്രസ് നേതൃത്വം ഏറ്റെടുക്കുമെന്ന് അറിയിച്ചിരുന്നു.