പാതിരാത്രി ഉമ്മൻചാണ്ടിയെത്തി; എ.വി ഗോപിനാഥ്​ പാർട്ടിക്ക്​ വഴങ്ങി

പാലക്കാട്​: കോൺഗ്രസ്​ നേതൃത്വവുമായി ഇടഞ്ഞു നിന്ന നേതാവ്​ എ.വി ഗോപിനാഥ്​ ഒടുവിൽ വഴങ്ങി. ഇന്നു മുതൽ തെരഞ്ഞെടുപ്പ്​ പ്രചരണപ്രവർത്തനങ്ങളിൽ സജീവമാകുമെന്ന്​ മുൻ മുഖ്യമന്ത്രി ഉമ്മൻ ചാണ്ടിയുടെ സാന്നിധ്യത്തിൽ അദ്ദേഹം പ്രഖ്യാപിച്ചു. കഴിഞ്ഞ ദിവസം രാത്രി 12 മണിക്ക്​ ​േശഷമാണ്​ അനുനയ നീക്കവുമായി ഉമ്മൻചാണ്ടി പെരിങ്ങോട്ടുകുറിശ്ശിയിലെ എ.വി ഗോപിനാഥിന്‍റെ വീട്ടിലെത്തിയത്​.

നേരത്തെ, ഡി.സി.സി ഭാരവാഹിത്വമടക്കം നിരവധി പദവികൾ വഹിച്ചിരുന്ന കോൺഗ്രസ്​ നേതാവാണ്​ എ.വി ഗോപിനാഥ്​. സ്​ഥാനാർഥി നിർണയമടക്കമുള്ള പല കാര്യങ്ങളിലും പാർട്ടി നേതൃത്വവുമായി ഇപ്പോൾ ഉടക്കി നിൽക്കുകയായിരുന്നു ​അദ്ദേഹം. കെ. സുധാകരനടക്കമുള്ള നേതാക്കൾ നേരിട്ട്​ ഇടപെട്ടിട്ടും ഗോപിനാഥ്​ വഴങ്ങിയിരുന്നില്ല. തന്നെ അനുകൂലിക്കുന്നവരുടെ യോഗം വിളിച്ച ഗോപിനാഥ്​ കോൺഗ്രസ്​ വിടുമെന്ന സൂചന നൽകിയിരുന്നു.

നേരത്തെ, ഗോപിനാഥുമായി ഉമ്മൻ ചാണ്ടി ഫോണിൽ സംസാരിച്ചിരുന്നെങ്കിലും പ്രശ്​നപരിഹാരമായിരുന്നില്ല. കഴിഞ്ഞ ദിവസം പുതുപ്പള്ളിയിലെ പ്രചരണ പ്രവർത്തനങ്ങൾ കഴിഞ്ഞ ശേഷമാണ്​ ഉമ്മൻചാണ്ടി പാലക്കാട്ടുള്ള ഗോപിനാഥിന്‍റെ വീട്ടിലേക്ക്​ തിരിച്ചത്​. ഉമ്മൻചാണ്ടി രാത്രി 12 മണിക്ക്​ ശേഷമാണ്​ ഗോപിനാഥിന്‍റെ വീട്ടിലെത്തുന്നത്​. 15 മിനിറ്റോളം നീണ്ട ചർച്ചയിൽ പ്രശ്​നം പരിഹരിക്കപ്പെടുകയായിരുന്നു