ജയിൽ തടവുകാർക്ക്​ അപ്പീലും പരോൾ അപേക്ഷകളും സമർപ്പിക്കാൻ ഓൺലൈൻ സംവിധാനം

കൊച്ചി: ജയിലിലെ തടവുകാർക്ക്​ അപ്പീലും പരോൾ അപേക്ഷകളും സമർപ്പിക്കാൻ ഓൺലൈൻ സംവിധാനം നിലവിൽവന്നു. ഹൈകോടതിയിലെ കേസ് മാനേജിങ് സംവിധാനവും ജയിൽ വകുപ്പിന്റെ ടെക്നിക്കൽ സെല്ലും സഹകരിച്ചാണ് സംസ്ഥാനത്തെ 57 ജയിലുകളിലും ജൂലൈ ഒന്നുമുതൽ സൗകര്യം നടപ്പാക്കുന്നത്​. രാജ്യത്ത് ആദ്യമായാണ് ഇത്തരമൊരു സംവിധാനം ജയിലുകളിൽ കൊണ്ടുവരുന്നത്.

കെൽസയും ഹൈകോടതി ഐ.ടി ഡയറക്ടറേറ്റും പ്രത്യേകം എസ്.ഒ.പിക്കും രൂപംനൽകിയിട്ടുണ്ട്. ചീഫ് ജസ്റ്റിസിന്റെ അനുമതിയോടെയാണ് ജയിലിലും ഇ-ഫയലിങ് സംവിധാനം നടപ്പാക്കിയത്.

തടവുകാരുടെ അപ്പീലുകളും മറ്റ് അപേക്ഷകളും ഓൺലൈൻവഴി ഫയൽ ചെയ്യാനുള്ള ക്രമീകരണങ്ങളൊരുക്കാൻ ജയിൽ ഡി.ജി.പിക്ക്​ ഹൈകോടതി രജിസ്ട്രാർ ജനറൽ നിർദേശം നൽകി.