വിദ്യാഭ്യാസ വകുപ്പിലെ ഓൺലൈൻ സ്ഥലംമാറ്റത്തിന് ഒടുവിൽ വിജ്ഞാപനമായി

തൃശൂർ: സർക്കാർ-കോടതി ഉത്തരവുകൾ നിരവധിയുണ്ടായിട്ടും മൂന്നുവർഷം നീട്ടിക്കൊണ്ടുപോയ പൊതുവിദ്യാഭ്യാസ വകുപ്പിലെ മിനിസ്​റ്റീരിയല്‍ ജീവനക്കാരുടെ ഓൺലൈൻ വഴിയുള്ള പൊതു സ്ഥലംമാറ്റത്തിന് ഒടുവിൽ അംഗീകാരം. സ്ഥലംമാറ്റം സംബന്ധിച്ച മാനദണ്ഡങ്ങള്‍ നിശ്ചയിച്ചും അപേക്ഷ ക്ഷണിച്ചും പൊതുവിദ്യാഭ്യാസ വകുപ്പ് വിജ്ഞാപനം പുറപ്പെടുവിച്ചു.

വകുപ്പിന്​ കീഴിലുള്ള ഓഫിസുകളില്‍ ക്ലര്‍ക്ക്, ടൈപിസ്​റ്റ്​, ജൂനിയര്‍ സൂപ്രണ്ട്, സീനിയര്‍ സൂപ്രണ്ട് തസ്തികകളില്‍ ജോലിനോക്കുന്നവർക്ക് ഓണ്‍ലൈന്‍ മുഖേന 2020 വര്‍ഷത്തെ പൊതു സ്ഥലംമാറ്റത്തിന് അപേക്ഷിക്കാമെന്ന് ഉത്തരവിൽ പറയുന്നു. കക്ഷിരാഷ്​ട്രീയ ഭേദമന്യേ പ്രവർത്തിക്കുന്ന വിദ്യാഭ്യാസവകുപ്പിലെ ഏക അംഗീകൃത സംഘടനയായ കേരള വിദ്യാഭ്യാസവകുപ്പ് മിനിസ്​റ്റീരിയൽ സ്​റ്റാഫ് യൂനിയൻ (കെ.ഇ.ഡി.എം.എസ്.യു) കഴിഞ്ഞ ജൂണിൽ കോടതിയലക്ഷ്യം ഫയൽ ചെയ്​തതിനെ തുടർന്നാണ് ഇപ്പോൾ ഉത്തരവിറങ്ങിയത്.

സർക്കാർ ജീവനക്കാരുടെ സ്ഥലമാറ്റം ഓൺലൈൻ മുഖേന നടപ്പാക്കണമെന്ന് ഉദ്യോഗസ്ഥ ഭരണപരിഷ്കാര വകുപ്പ് 2017ൽ ഉത്തരവിട്ടെങ്കിലും വിദ്യാഭ്യാസവകുപ്പിൽ നടപ്പാക്കിയിരുന്നില്ല. ഇതേത്തുടർന്ന് കെ.ഇ.ഡി.എം.എസ്.യു കേരള അഡ്മിനിസ്ട്രേറ്റിവ് ട്രൈബ്യൂണലിനെ സമീപിച്ച്​ ഓൺലൈൻ സ്ഥലംമാറ്റം നടപ്പാക്കാൻ 2019 മേയ് 30ന്‌ അനുകൂലവിധി നേടിയെങ്കിലും നടപ്പാക്കിയില്ല.

തുടർന്നാണ്​​ സംഘടന ട്രൈബ്യൂണലിൽ കോടതിയലക്ഷ്യ ഹരജി ഫയൽ ചെയ്​തത്​. പൊതു സ്ഥലംമാറ്റ വിജ്ഞാപനം പൊതുവിദ്യാഭ്യാസ വകുപ്പി‍ൻെറ ഔദ്യോഗിക വെബ്സൈറ്റായ www.education.kerala.gov.in ൽ ലഭ്യമാണ്. അപേക്ഷ സ്വീകരിക്കുന്ന അവസാന തീയതി ഒക്​ടോബർ 27.