സംസ്​ഥാനത്ത്​ വീണ്ടും കോവിഡ്​ മരണം; മരിച്ചത് കോഴിക്കോട്​ മാവൂർ സ്വദേശിനി

കോഴിക്കോട്​: സംസ്​ഥാനത്ത്​ വീണ്ടും കോവിഡ്​ മരണം. കോഴിക്കോട്​ ജില്ലയിലെ മാവൂർ സ്വദേശിനി സുലൈഖയാണ്​ (56) മെഡി.കോളജ്​ ആശുപത്രിയിൽ മരിച്ചത്​. ഇവരുടെ ഭർത്താവിനും രോഗം സ്​ഥിരീകരിച്ചിട്ടുണ്ട്​. ഉംറ കഴിഞ്ഞ്​ വന്നതായിരുന്നു. കഴിഞ്ഞ ബുധനാഴ്​ചയാണിവർക്ക്​  രോഗം സ്​ഥിരീകരിച്ചത്​.  

മെയ് 21ന് കണ്ണൂര്‍ വിമാനത്താവളത്തിലെത്തി വീട്ടില്‍ നിരീക്ഷണത്തിലായിരുന്നു സുലൈഖ. മെയ് 25 ന് രോഗലക്ഷണം കണ്ടതിനെ തുടര്‍ന്ന് കോഴിക്കോട് മെഡിക്കല്‍ കോളേജ് ആശുപത്രിയില്‍ സ്രവ പരിശോധന നടത്തുകയായിരുന്നു.  ബുധനാഴ്ചയാണ്​ ഫലം പോസിറ്റീവായത്​. 

കോഴിക്കോട്​ ജില്ലയിലെ ആദ്യത്തെ കോവിഡ്​ മരണമാണിത്​. മലപ്പുറം, കണ്ണൂർ, വയനാട്​ സ്വദേശികൾ​ നേരത്തേ കോഴിക്കോട്ട്​ ചികിത്സയിലിരിക്കേ മരിച്ചിരുന്നു. 

അതേസമയം, ജില്ലയില്‍ ഞായറാഴ്​ച രണ്ട് കോവിഡ് പോസിറ്റിവ് കേസുകള്‍ കൂടി റിപ്പോര്‍ട്ട് ചെയ്തതായും നാല് പേരുടെ ഫലം നെഗറ്റിവായതായും ജില്ല മെഡിക്കല്‍ ഓഫിസര്‍ ഡോ. വി. ജയശ്രീ അറിയിച്ചു. 23 വയസ്സുള്ള കൊടുവള്ളി സ്വദേശിനിയാണ് രോഗം സ്ഥിരീകരിച്ച ഒന്നാമത്തെയാൾ.മേയ് 18 ന് ഖത്തറില്‍ നിന്ന്​ കോഴിക്കോട്ടെത്തി വീട്ടില്‍ നിരീക്ഷണത്തില്‍ കഴിയുകയായിരുന്നു. മേയ് 30 ന് കോഴിക്കോട് മെഡിക്കല്‍ കോളജില്‍ സ്രവ പരിശോധന നടത്തുകയും കോവിഡ് പോസിറ്റിവ് ആവുകയും ചെയ്തു. ശനിയാഴ്​ച ഇവരുടെ ഒരു വയസ്സുള്ള കുഞ്ഞിന്​ കോവിഡ് സ്​ഥിരീകരിച്ചിരുന്നു.    

രണ്ടാമത്തെയാൾ 36 വയസ്സുള്ള കല്ലാച്ചി നാദാപുരം സ്വദേശിയാണ്. മേയ് 27 ന് ദുബൈയില്‍ നിന്ന്​ വിമാനമാര്‍ഗം കണ്ണൂരിലെത്തി സര്‍ക്കാര്‍ സജ്ജമാക്കിയ വാഹനത്തില്‍ വടകര കൊറോണ കെയര്‍ സ​​െൻററില്‍ നിരീക്ഷണത്തിലായിരുന്നു. രോഗലക്ഷണങ്ങള്‍ കണ്ടതിനെ തുടര്‍ന്ന് മേയ് 29ന് കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. രണ്ട് പേരുടേയും ആരോഗ്യനില ഇപ്പോള്‍ തൃപ്തികരമാണ്.  

ജില്ലയില്‍ കോവിഡ് ചികിത്സയിലുണ്ടായിരുന്ന നാല്​ പേര്‍ ഞായറാഴ്​ച രോഗമുക്തരായി. മെഡിക്കല്‍ കോളജില്‍ ചികിത്സയിലായിരുന്ന മൂന്ന്​ പേരും കോവിഡ് ഫസ്​റ്റ്​ ലൈന്‍ ട്രീറ്റ്‌മ​​െൻറ്​ സ​​െൻററില്‍ ഒരാളുമാണ് രോഗവിമുക്തരായത്. ഇപ്പോള്‍ 34 കോഴിക്കോട് സ്വദേശികള്‍ കോവിഡ് പോസിറ്റിവായി ചികിത്സയിലുണ്ട്. 

ഞായറാഴ്​ച 257 സ്രവ സാമ്പിള്‍ പരിശോധനക്ക് അയച്ചിട്ടുണ്ട്. ആകെ 4,993 സ്രവ സാമ്പിളുകള്‍ പരിശോധനക്ക് അയച്ചതില്‍ 4,683 എണ്ണത്തി​​​െൻറ ഫലം ലഭിച്ചു. ഇതില്‍ 4,600 എണ്ണം നെഗറ്റിവ് ആണ്. പരിശോധനക്കയച്ച സാമ്പിളുകളില്‍ 310 പേരുടെ പരിശോധന ഫലം കൂടി ലഭിക്കാന്‍ ബാക്കിയുണ്ട്.