ക്രിസ്മസ് ദിനത്തിൽ കനിവ് 108 ആംബുലൻസിൽ യുവതിക്ക് ആൺകുഞ്ഞ് പിറന്നു

കൊല്ലം: ക്രിസ്മസ് ദിനത്തിൽ ആശുപത്രിയിലേക്കുള്ള യാത്രാമധ്യേ കനിവ് 108 ആംബുലൻസിനുള്ളിൽ യുവതിക്ക് ആൺകുഞ്ഞ് പിറന്നു. കുണ്ടറ സ്വദേശിനിയായ 28 കാരിയാണ് ആംബുലൻസിനുള്ളിൽ ആൺ കുഞ്ഞിന് ജന്മം നൽകിയത്. കുണ്ടറ താലൂക്ക് ആശുപത്രിയിൽ എത്തിയ യുവതിയെ വിദഗ്ധ ചികിത്സക്കായി തിരുവനന്തപുരം എസ്.എ.ടി ആശുപത്രിയിലേക്ക് ഡോക്ടർ റഫർ ചെയ്യുകയായിരുന്നു. ഇതിനായി ഡോക്ടർ കനിവ് 108 ആംബുലൻസിന്റെ സേവനം തേടി.

കൺട്രോൾ റൂമിൽ നിന്ന് നൽകിയ അത്യാഹിത സന്ദേശത്തിന്റെ അടിസ്ഥാനത്തിൽ കൊട്ടാരക്കര താലൂക്ക് ആശുപത്രിയിലെ കനിവ് 108 ആംബുലൻസ് പൈലറ്റ് കൃഷ്ണരാജ് എമർജൻസി മെഡിക്കൽ ടെക്നീഷ്യൻ രശ്മി ഐ.ആർ എന്നിവർ കുണ്ടറ താലൂക്ക് ആശുപത്രിയിൽ എത്തി യുവതിയുമായി തിരുവനന്തപുരം എസ്.എ.ടി ആശുപത്രിയിലേക്ക് തിരിച്ചു.

ആംബുലൻസ് വെഞ്ഞാറമൂട് എത്തുമ്പോഴേക്കും യുവതിയുടെ ആരോഗ്യനില കൂടുതൽ വഷളാവുകയും തുടർന്ന് എമർജൻസി മെഡിക്കൽ ടെക്നീഷ്യൻ രശ്മി നടത്തിയ പരിശോധനയിൽ പ്രസവം കഴിയാതെ മുന്നോട്ട് പോകാനാവില്ല എന്ന് മനസ്സിലാക്കി ആംബുലൻസിൽ ഇതിനുവേണ്ട സജ്ജീകരണങ്ങൾ ഒരുക്കി. 10 മണിയോടെ രശ്മിയുടെ പരിചരണത്തിൽ യുവതി കുഞ്ഞിന് ജന്മം നൽകുകയായിരുന്നു. തുടർന്ന് അമ്മക്കും കുഞ്ഞിനും വേണ്ട പ്രഥമ ശുശ്രൂഷ രശ്മി നൽകി. ഉടൻ ആംബുലൻസ് പൈലറ്റ് കൃഷ്ണരാജ് അമ്മയെയും കുഞ്ഞിനെയും സമീപത്തെ സ്വകാര്യ ആശുപത്രിയിൽ എത്തിച്ചു.