എം.ടി രമേശിന്റെ ഭാര്യ ഒ.എം.ശാലിന കേരള ഹൈകോടതി ഡി.എസ്​.ജി; ഉത്തരവിറക്കി കേന്ദ്രസർക്കാർ, ഈ പദവിയിലെത്തുന്ന ആദ്യ വനിത

കൊച്ചി: കേരള ഹൈകോടതിയിൽ കേന്ദ്ര സർക്കാറിനെ പ്രതിനിധീകരിക്കുന്ന ഡെപ്യൂട്ടി സോളിസിറ്റർ ജനറൽ (ഡി.എസ്​.ജി) ആയി അഡ്വ. ഒ.എം. ശാലിനയെ നിയമിച്ചു. ഇതുസംബന്ധിച്ച്​ കേന്ദ്ര നിയമ മന്ത്രാലയം ഉത്തരവ്​ പുറപ്പെടുവിച്ചു. ബി.ജെ.പി സംസ്ഥാന ജന. സെക്രട്ടറി എം.ടി. രമേശിന്റെ ഭാര്യയാണ്

2021 മുതൽ സെൻട്രൽ അഡ്മിനിസ്ട്രേറ്റിവ് ട്രൈബ്യൂണലിൽ സീനിയർ സെൻട്രൽ ഗവൺമെന്റ് സ്റ്റാന്റിങ്​ കൗൺസൽ ആയിരുന്നു. സംസ്ഥാനത്ത്​ ആദ്യമായാണ്​ ഒരു വനിത​ ഡി.എസ്​.ജിയായി നിയമിക്കപ്പെടുന്നത്​. കെ.എ.ടിയിൽ സീനിയർ സെൻട്രൽ ഗവണ്മെന്റ് സ്റ്റാന്റിങ്​ കൗൺസൽ, ഡി.എസ്​.ജി എന്നീ രണ്ട്​ പദവികളിൽ നിയമിക്കപ്പെടുന്ന ആദ്യ വനിതയുമാണ്​.

പാലക്കാട് ഗവ. വിക്ടോറിയ കോളജിൽനിന്ന് കോമേഴ്സിലും എറണാകുളം ലോ കോളജിൽനിന്ന് നിയമത്തിലും ബിരുദമെടുത്ത ശാലിന 1999ൽ അഭിഭാഷകയായി എൻറോൾ ചെയ്തു. 2015ൽ ഹൈകോടതിയിൽ കേന്ദ്ര സർക്കാർ അഭിഭാഷകയായി.

ഷൊർണൂർ ഒറോംപാടത്ത് ഒ.കെ. മുകുന്ദന്റെയും സാവിത്രിയുടെയും മകളാണ്. ഇടപ്പള്ളി അമൃത ​സ്കൂൾ ഓഫ്​ ആർട്​സ്​ ആന്‍റ്​ സയൻസ് ​കോളജിലെ രണ്ടാംവർഷ ബിരുദ വിദ്യാർഥി ജ്വാല മകളാണ്​.