യു.ഡി.എഫ് സ്ഥാനാർഥിയുടെ ദേഹത്ത് കരിഓയിൽ ഒഴിച്ചു; അജ്ഞാതർ എത്തിയത് ഹെൽമറ്റ് ധരിച്ച്

ഇലവുംതിട്ട (പത്തനംതിട്ട): സ്ഥാനാർഥിയുടെ ദേഹത്ത് കരിഓയിൽ ഒഴിച്ചതായി പരാതി. മെഴുവേലി ഗ്രാമപഞ്ചായത്ത് പത്താം വാർഡിലെ യു.ഡി.എഫ് സ്ഥാനാർഥി ബിജോ വർഗീസിന്റെ ദേഹത്താണ് ബൈക്കിലെത്തിയ അജ്ഞാതർ കരിഓയിൽ ഒഴിച്ചത്.

ബിജോയുടെ വീടിന് സമീപം -ഇലവുംതിതിട്ട രാമൻചിറ റോഡിലെ പട്ടിരേത്ത്പടിയിൽ -ശനിയാഴ്ച വൈകീട്ട്​ അഞ്ചോടെയായിരുന്നു സംഭവം. ഇരുചക്ര വാഹനത്തിൽ എത്തിയ രണ്ടുപേർ കരിഓയിൽ ഒഴിച്ച ശേഷം അതിവേഗതയിൽ വാഹനം ഓടിച്ചു കടന്നതായി ബിജോ പറയുന്നു.

ഹെൽമറ്റ് ധരിച്ചിരുന്നതിനാൽ ആളുകളെ മനസ്സിലായില്ലെന്ന് പൊലീസിന് നൽകിയ പരാതിയിൽ പറയുന്നു. മൊഴി എടുത്തതായും അന്വേഷണം ആരംഭിച്ചതായും പൊലീസ്​ പറഞ്ഞു.