ഇന്ധന നികുതി ഒഴിവാക്കണം -എം.എം. ഹസന്‍

തിരുവനന്തപുരം: ഇന്ധന വില കുതിച്ചുയര്‍ന്ന  സാഹചര്യത്തില്‍ കേന്ദ്ര-സംസ്​ഥാന സര്‍ക്കാറുകള്‍ ഇവയുടെ നികുതികള്‍ കുറക്കണമെന്ന്​ കെ.പി.സി.സി പ്രസിഡൻറ്​ എം.എം. ഹസന്‍. ഒരു ലിറ്റര്‍ പെട്രോളിന് 29.69 രൂപ കേന്ദ്ര നികുതിയും 17.44 രൂപ സംസ്​ഥാന നികുതിയുമാണ്. അന്താരാഷ്​ട്ര വിപണിയില്‍ അസംസ്‌കൃത എണ്ണയുടെ വില കുത്തനെ ഇടിഞ്ഞുനിൽക്കുമ്പോഴാണ് കേന്ദ്ര-സംസ്​ഥാന സര്‍ക്കാറുകള്‍ നിഷ്‌കരുണം ജനങ്ങളെ കുത്തിപ്പിഴിയുന്നത്​. ഒരു ഉൽപന്നത്തി​​െൻറ വിലയുടെ പകുതിയോളം നികുതി ഈടാക്കുന്നത് തീവെട്ടിക്കൊള്ളയാണ്​.

രാജ്യത്ത് അനുഭവപ്പെടുന്ന അഭൂതപൂര്‍വമായ വിലക്കയറ്റത്തിന്​ പ്രധാന കാരണം പെട്രോൾ, ഡീസല്‍ വിലയാണ്. കൊള്ളനികുതി എടുത്തുകളഞ്ഞാല്‍ വിലക്കയറ്റം വലിയൊരളവില്‍ നിയന്ത്രിക്കാനാകും. പെട്രോള്‍, ഡീസല്‍ വില നാമമാത്രമായി കൂടിയപ്പോള്‍ പോലും സമരവും ഹര്‍ത്താലും നടത്തിയ സി.പി.എമ്മും ബി.ജെ.പിയും ഇപ്പോള്‍ കാശിക്കുപോയോ എന്നും ഹസന്‍ ചോദിച്ചു. വിലക്കയറ്റം തടയണമെന്നാവശ്യപ്പെട്ട് കോണ്‍ഗ്രസ് ശക്​തമായ പ്രക്ഷോഭ പരിപാടികള്‍ക്ക് രൂപം നൽകും. 13ന്​ ചേരുന്ന കോണ്‍ഗ്രസ് രാഷ്​ട്രീയകാര്യ സമിതി ഇക്കാര്യം തീരുമാനിക്കുമെന്നും അദ്ദേഹം അറിയിച്ചു.